Астана қаласы Алматы ауданы прокуратурасының бөлім басшысы Сандуғаш Қыстықбаева елорданың Коммуникациялар қызметінде өткен брифингте қазіргі қылмыстық ахуал мен қауіпсіз орта қалыптастыру жайлы түсіндіріп берді, деп хабарлайды қала әкімдігінің ресми сайты.
Қылмыстық әрекеттер барған сайын күрделеніп барады – азаматтардың мүлкін (пәтер, көлік) иемденуден бастап, банктік деректерін алаяқтарға беретін «дропперлерді» пайдалануға дейін. Биыл осындай адамдардан азаматтық іс жүргізу тәртібімен 25,5 миллион теңгеден астам қаражат өндіріп алынды. Бұл нәтиже Азаматтық іс жүргізу кодексінің 953-бабы негізінде құқық қолдану тәжірибесінің арқасында мүмкін болды, деп хабарлайды DKnews.kz.
Тағы бір қауіпті үрдіс – жастарды «қашықтан жұмыс» деген желеумен есірткі таратумен айналысуға тарту. Әлеуметтік желілер арқылы жастарға жоғары табыс уәде етілген курьерлік, «закладчик», қойма қызметкері сынды «жұмыстар» ұсынылады. Алайда мұндай заңсыз әрекеттер үшін 20 жылға дейін бас бостандығынан айыру жазасы қарастырылған.
Қылмыстың алдын алу жұмысы жүйелі түрде жүргізіледі. Ауданда құқықбұзушылықтардың алдын алу жөніндегі жұмыс тобы жұмыс істейді. Ол қолайсыз және толық емес отбасылармен, сондай-ақ мигранттармен нақты жұмыс жүргізеді. Полициямен бірлесіп ойын-сауық орындары мен шағын бизнес нысандарын қамтитын рейдтер тұрақты түрде өткізіледі. Мысалы, биылдың өзінде полицияға 300-ден астам шағым түскен дәмхананың жұмысы әкімшілік сот шешімімен тоқтатылды.
Басты бағыттардың бірі – балалардың құқықтарын қорғау. Осы мақсатта әлеуметтік осал топтардан шыққан жастармен және балалармен жұмыс істеуге бағытталған «Жас үміт» жобасы жүзеге асырылуда. Ерекше көңіл буллингтің, тұрмыстық зорлық-зомбылықтың және жасөспірімдер арасындағы суицидтің алдын алуға бөлінеді.
Аудан мектептері отбасындағы немесе мектептегі проблемалар туралы алғашқы «қоңырауларға» жедел ден қою бойынша үйлестірілген. Мектептерде Telegram-дағы «URPAQ» (@urpaq_helpbot) ботына QR-кодтар орнатылған, бұл балаларға анонимді түрде көмек сұрауға мүмкіндік береді. Сонымен қатар, интерактивті дәрістер, сот процесінің симуляциялары, прокурорлар, психологтар және педагогтар қатысатын ата-аналар жиналыстары өткізіледі.
Ата-аналар үшін «Ата-аналық бақылау» функциясын пайдалану бойынша нұсқаулықтар әзірленіп, педагогтерге балаларға зиян келтіргені үшін қылмыстық жауапкершілік туралы ақпарат беріліп жатыр.
Тұрғындармен тұрақты кездесулер «Заң және Тәртіп» қағидаты аясында өткізіледі. Бұл – халыққа жақын болудың, сенімді нығайтудың және қазіргі заман сын-қатерлеріне бірге төтеп берудің нақты қадамы. Мұндай іс-шараларға прокуратура өкілдерімен қатар полиция, әкімдік және тиісті ұйымдардың қызметкерлері де қатысады», – деді прокуратура өкілі.
