Денсаулық сақтау министрлігінде вице-министрлердің, құрылымдық бөлімшелер басшыларының және кеңес мүшелерінің қатысуымен Қоғамдық кеңестің кезекті отырысы өтті, деп хабарлайды DKnews.kz.
Қатысушылар міндетті әлеуметтік медициналық сақтандыру мен медициналық қызметтер көрсетудегі өзгерістерді іске асыруды, медициналық көмектің бірыңғай пакетін қалыптастыруды, сондай-ақ ӘлМСҚ қызметін жетілдіруді талқылады.
Отырыстың барысында Мемлекет басшысы ағымдағы жылдың 14 шілдесінде қол қойған жаңа заңның негізгі ережелері ұсынылды. Заң денсаулық сақтаудың қаржылық тұрақтылығын арттыруға, жарналарды бөлудің әділдігіне және халықты қамтуды кеңейтуге бағытталған МӘМС жүйесін реформалау жөніндегі кешенді шараларды көздейтінін естеріңізге сала кетейік. МӘМС жүйесін 2020 жылдан бастап енгізу саланы қаржыландыруды едәуір ұлғайтуға мүмкіндік берді, алайда бұл ретте халықты медициналық сақтандырумен қамтудың төмендігі, медициналық көмектің аралас пакеттері және қаржыландырудың сақталып отырған тапшылығы сияқты құрылымдық проблемалар сақталды.
Маңызды өзгерістердің бірі МӘМС жарналары есептелетін табыстың жоғарғы шегін — ең төменгі жалақының 10-нан 40-қа дейін арттыру болды. Бұл табыс деңгейі жоғары тұлғалар үшін неғұрлым әділ қатысу жүйесін жасайды және жыл сайын шамамен 200 млрд теңгені қосымша жинақтауға мүмкіндік береді.
«Біз 2015 жылы МӘМС туралы ҚР Заңының бірінші редакциясында белгіленген бастапқы қаржы моделіне ішінара оралуды бастаймыз. Содан кейін мемлекет жарналарының мөлшерлемелері қазіргі 2%-ға қарсы 7% деңгейінде бекітілді. Бұл қызметкерлер мен жұмыс берушілер үшін жарналарды ұлғайтпауға, ұзақ мерзімді перспективада медициналық көмек жүйесін қолдауға мүмкіндік береді. Кезең-кезеңмен көтерілу нәтижесінде мемлекет жарналарының мөлшерлемесі ағымдағы жылы 2%-дан 2037 жылы 4,7%-ға дейін өседі, бұл денсаулық сақтау жүйесіне 2,8 трлн қосымша қаражат алуға мүмкіндік береді», - деп атап өтті Денсаулық сақтау вице-министрі Ардақ Амангелдиев.
Заңда медициналық сақтандырумен қамтуды кеңейтуге ерекше назар аударылған. Бүгінгі таңда Қазақстанда халықтың 82,3%-ы сақтандырылған, алайда жүйеден тыс шамамен 3,3 млн адам қалып отыр. Жұмыссыздар мен дағдарыстық, шұғыл әл-ауқат деңгейлері санатына кіретін адамдар үшін жарналарды жергілікті атқарушы органдар төлейтін болады.
«Сондай-ақ МӘМС жүйесінің тартымдылығы үшін тиісті жарналарды бес жыл бойы үзіліссіз төлеу шартымен төлемдер уақытша болмаған жағдайда да сақтандырылған тұлға мәртебесін 3 айдан 6 айға дейін ұзарту туралы норма енгізілді. Бұрын бұл мерзім небәрі үш ай болатын. Бұл әділ және маңызды шешім - бұл жүйеге тұрақты қатысатын және уақытша қиындықтарға тап болғандарды қолдайды. Сондай-ақ халықтың сенімін нығайту мақсатында денсаулық сақтау субъектілерінің қаржылық қызметінің ашықтығын арттыру үшін медициналық ұйымдар мен Қор қызметінің ашықтығын арттыру жөніндегі норма енгізілді», - деп толықтырды А.Амангелдиев.
Отырыста салалық қаржыландырудың тұрақтылығын сақтаудың маңыздылығы атап өтілді. Міндеттемелерді ТМККК-дан МӘМС-ке ауыстыру Денсаулық сақтау министрлігінің бюджетін 200 млрд теңгеге қысқартуды көздегеніне қарамастан, Қаржы министрлігімен өзара іс-қимылдың арқасында бұл қаражатты жүйе ішінде сақтап қалуға мүмкіндік туды. Олар басым бағыттардағы тарифтерді арттыруға, онкологиялық және онкогематологиялық қызметтерді, жедел жәрдем қызметі мен МСАК-ты қаржыландыруды ұлғайтуға бағытталатын болады.
Бұдан басқа, 2026 жылдан бастап 9 негізгі бейін бойынша (инфекция, кардиология, неврология, нефрология, гастроэнтерология, травматология, эндокринология, абдоминалдық хирургия) 90 млрд теңгеден астам сомаға тарифтер айтарлықтай арттырылатын болады. Бұл алты жылда алғаш рет стационарлық сектордағы шығынды тарифтерді өзектендіруге мүмкіндік береді.
Жалпы қабылданған заң денсаулық сақтау жүйесінің ұзақ мерзімді қаржылық тұрақтылығын, халықтың сенімін арттыруды қамтамасыз ететін шешім болып табылады. Медициналық көмек пакеттері оңайырақ және түсінікті болады, ал МӘМС қорының жұмысы — барынша ашық және пациенттердің мүдделеріне бағдарланған болады.
Қаржыландырудың жаңа моделі ресурстарды барынша тиімді бөлуге және елдің денсаулық сақтау саласын дамытудағы сақтандыру тетігінің рөлін күшейтуге жағдай жасайды.
