Денсаулық сақтаудың бірінші вице-министрі Тимур Сұлтанғазиев Ұлыбританияның Қазақстандағы Төтенше және Өкілетті Елшісі Кэтрин Личпен кездесу өткізді, деп хабарлайды DKNews.kz.
Кездесу Лич ханымның Қазақстандағы дипломатиялық миссиясының аяқталуына байланысты өтті.
Әңгімелесу барысында Т. Сұлтанғазиев елшіге денсаулық сақтау саласындағы екіжақты ынтымақтастықты дамытуға қосқан елеулі үлесі үшін шын жүректен алғысын білдірді.
Екі ел арасындағы тұрақты байланыстардың маңыздылығын атап өтіп, ол Лич ханымның қызметінде болған кезеңінде жүзеге асырылған бірлескен бастамалардың, денсаулық сақтау саласындағы зерттеу жобаларының табысты іске асырылуын атап өтті.
Тараптар басталған бастамаларды жалғастыру және денсаулық сақтау саласындағы стратегиялық әріптестікті нығайту қажеттігін атап өтіп, өзара іс-қимыл қорытындылары мен одан әрі ынтымақтастықтың перспективаларын талқылады.
Дәрілік заттар мен медициналық бұйымдарға шекті бағаларды реттеу мәселелеріне ерекше назар аударылды.
Кездесу барысында Қазақстан медициналық қызметтердің сапасы мен қолжетімділігін арттыруға, денсаулық сақтау инфрақұрылымын дамытуға, медициналық ұйымдарды жаңғырту мен жарақтандыруға, бірлескен ғылыми зерттеулер жүргізуге, медициналық және фармацевтикалық өнеркәсіпті дамытуға, тәжірибе алмасуға және мамандардың біліктілігін арттыруға бағытталған инвестициялар мен инновацияларды тартуға мүдделі екендігі атап өтілді.
Кездесу соңында қазақстандық тарап 2026 жылы Қазақстан мен Ұлыбритания арасындағы денсаулық сақтау саласындағы ведомствоаралық келісімге қол қою мүмкіндігін қарастыруды ұсынды.
Кэтрин Личтің денсаулық сақтау саласындағы қазақстан-британ ынтымақтастығын дамытуға қосқан жеке үлесін атап өтіп, бірінші вице-министр дипломатқа «Денсаулық сақтау ісіне қосқан үлесі үшін» төсбелгісін табыс етті.
