Мәдениет және ақпарат министрі Аида Балаева өзінің Facebook-тегі жазбасында Алматыдағы Әбілхан Қастеев атындағы Мемлекеттік өнер музейінің ауқымды қайта жаңғырту жұмыстары басталғанын хабарлады. Senim Qogamy қоры мен «Самрук-Қазына» АҚ қолдауының арқасында музей 5 тамыздан бастап уақытша жабылды. Ол өзіне тән бірегей өнер туындыларына сай заманауи әрі жайлы кеңістікке айналады.
Ел бойынша мәдени нысандарды жаңғырту мен сақтау жөніндегі мемлекеттік бағдарламаның аясында Қазақстанның басты өнер орталықтарының бірі — Алматыдағы Әбілхан Қастеев атындағы Мемлекеттік өнер музейінде белсенді жөндеу-қалпына келтіру жұмыстары басталды.
Жаңғырту аясында шатырды ауыстыру, заманауи климаттық жүйелерді орнату, паркет жабындысын қалпына келтіру және басқа да маңызды техникалық жетілдірулер қарастырылған. Бұл жұмыстар келушілер үшін қолайлы жағдай жасауға, сондай-ақ өнер туындыларының бірегей жинағын сақтау үшін қажет жағдайларды қамтамасыз етуге бағытталған.
Қайта жаңғырту жұмыстарына байланысты музей 5 тамыздан бастап келушілер үшін уақытша жабылды. Мұндай шешім ең алдымен музей экспонаттарының — еліміздің мәдени мұрасының — сақталуы мен құрылыс жұмыстары кезіндегі қауіпсіздікті қамтамасыз ету мақсатында қабылданды.
Senim Qogamy қорына және жобаның бас демеушісі — «Самрук-Қазына» АҚ-на шынайы алғысымызды білдіреміз. Олардың қолдауы музейді жаңғыртудың маңызды кезеңін бастауға мүмкіндік берді. Жұмыстарды мердігер ұйым — Lucky Build Company ЖШС атқаруда.
Барлық қайта жаңғырту кезеңдерінің аяқталуын асыға күтеміз және жаңарған музей өз қонақтарын жаңа, заманауи әрі шабыттандыратын кеңістікте қарсы алатынына сенімдіміз.
