Ксения Балабаева 2025 жылы 20 жасқа дейінгі жасөспірімдер арасында өткен рапид бойынша әлем чемпионатында жеңіске жетті. Турнир Перу астанасы Лимада өтіп жатыр. 19 жастағы алматылық шахматшы 9 турдан кейін 7 ұпай жинады. Жарыс швейцар жүйесі бойынша 15+10 уақыт бақылауымен (әр ойынға 15 минут және әр жүріске 10 секунд қосылады) өткізілді. Балабаева екі күннен кейін 5 ұпаймен көш бастап тұрған. Жарыстың соңғы күнін Ксения 47-ші жүрісте мат қойған Умида Омонованы жеңумен бастады. Кейін Анна Журова және Афруза Хамдамовамен сенімді тең ойнап, 1-ші орынды алдын ала қамтамасыз етті, деп хабарлайды DKNews.kz.
Ксения Балабаева – 2024 жылы Будапештте өткен шахмат олимпиадасында күміс алған Қазақстанның ересектер арасындағы әйелдер құрамасының мүшесі. Қазақстан намысын бұл чемпионатта сондай-ақ Лия Құрманғалиева мен Әмина Қайырбекова қорғады. Амина 6 ұпай жинап 7-ші орынға ие болса, Лия 5 ұпаймен 12-ші орында мәреге жетті.
2025 жылғы әлем чемпионаты (рапид, G20)
- WGM Ксения Балабаева (2287) – 7 ұпай;
- WIM Афруза Хамдамова (2384, Өзбекстан) – 6½;
- WFM Варвара Полякова (2065, FIDE) – 6½;
- WFM Анна Журова (2189, FIDE) – 6½;
- WIM Умида Омонова (2265, Өзбекстан) – 6;
- FM Фиорелла Контрерас Уаман (2152, Перу) – 6;
- WIM Әмина Қайырбекова (2259) – 6;
- IM Элине Рёберс (2409, Нидерланды) – 6;
- WGM Лия Құрманғалиева (2150) – 5.
Жігіттер арасында соңғы күннің алдында Өзбекстаннан шыққан үш шахматшы – гроссмейстер (GM) Мухиддин Мадаминов, халықаралық шеберлер (IM) Хумоюн Бегмуратов және Мухаммадзохид Суяров көш бастап тұрған. 16 жастағы Суяров рапид бойынша әлем чемпионы атанды.
2025 жылғы әлем чемпионаты (рапид, O20):
- IM Мухаммадзохид Суяров (2372, Өзбекстан) –7½ ұпай;
- GM Мухиддин Мадаминов (2458, Өзбекстан) – 7;
- GM Денис Лазавик (2579, Беларусь) – 7;
- IM Ликаэль Родерик Тикона Рокабадо (2367, Боливия) – 7;
- IM Аарав Денгла (2172, Үндістан) – 7.
26 қыркүйек – демалыс күні. 27–28 қыркүйекте блиц бойынша (3+2 форматы: партияға 3 минут және әр жүріске 2 секунд қосылады) 9 тур швейцар жүйесімен өтеді.
https://s2.chess-results.com/tnr1238565.aspx
2024 жылы тамыз айында Өзбекстан астанасы Ташкентте өткен жасөспірімдер арасындағы (U20) рапид пен блицтен әлем чемпионатында рапид бойынша әлем чемпиондары Максим Царук (FIDE/Беларусь) пен Александра Тарасенко (FIDE/Беларусь) атанса, блицте Денис Лазавик (FIDE/Беларусь) пен Тарасенко жеңімпаз болды. Қазақстандық шахматшылар жүлдегерлер қатарына кірмеді.
