Алматыда Қазақстан мен басқа елдердің жетекші дәрігерлері мен ғалымдарын біріктірген менопауза және андропаузаның екінші Еуразиялық конгресі өтті, деп хабарлайды DKNews.kz.
ДСҰ сарапшыларының деректеріне сәйкес, бүгінде әлемде 60 жастағы және одан асқан әйелдердің саны 1 миллиардтан асады. Ал менопаузаның басталу жасы, соның ішінде Қазақстанда да, салыстырмалы түрде тұрақты қалыпта қалып, орта есеппен 49–50 жасты құрайды. Осылайша, әйелдің өмірінің шамамен үштен бірі репродуктивті кезеңнен кейін өтеді.
Сонымен бірге, менопауза бүгінде қоғамдық денсаулық сақтау саласының өзекті мәселесіне айналды және таяу болашақта экономикалық сын-қатерге айналуы мүмкін.
«Бүгінде менопауза кезеңіндегі әйелдерге оңтайлы күтім көрсетуді қамтамасыз ету мәселесі барған сайын өзекті бола түсуде және қосымша ресурстарды талап етеді, себебі «әдемі жастағы» әйелдердің саны күннен-күнге артып келеді. Дүниежүзілік денсаулық сақтау ұйымы қазірдің өзінде менопаузалық кезеңді әйел өмірінің аса маңызды кезеңі деп танып, оның әлеуметтік, психологиялық және физикалық әл-ауқатын қоғамдық денсаулық сақтау жүйесінің ажырамас бөлігі ретінде қарастырады»,
— деп атап өтті Қазақстандық менопауза және андропауза қауымдастығының атқарушы директоры, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшесі Галина Гребенникова.
Ерлерге келсек, әлемдік зерттеулер 40 жастан асқан ерлердің 10–35%-ында климактериялық синдром белгілері байқалатынын көрсетеді. Олардың 51%-ында андрогендік бұзылыстардың (тестостерон тапшылығы) клиникалық белгілері анықталған, ал 3%-ында бұл бұзылыстардың айқын түрлері тіркелген.
Конгресс Қазақстан мен басқа да елдердің жетекші мамандарын тәжірибе алмасу, диагностика, емдеу және өтпелі кезеңдегі әйелдер мен ерлердің денсаулығын қолдаудың жаңа тәсілдерін талқылау, сондай-ақ қоғамдық денсаулық сақтау саласында пәнаралық стратегияларды әзірлеу үшін біріктірді.
Конгресс жұмысына халықаралық менопауза қоғамының (IMS) президенті, профессор Rosella Nappi қатысып, Қазақстанда бейімделетін менопаузаны басқару жөніндегі халықаралық ұсынымдарды таныстырды.
Шараның ұйымдастырушылары — Қазақстандық менопауза және андропауза қауымдастығы және Қазақстандық жыныстық және репродуктивті денсаулық қауымдастығы (КМПА).
Айта кетейік, Қазақстандық менопауза және андропауза қауымдастығы 2025 жылдың шілдесінде Asia-Pacific Menopause Federation (APMF) мүшесі атанды. Алда халықаралық жобаларды іске асыру, ұлттық клиникалық хаттамаларды жаңарту, ғылыми зерттеулер жүргізу жоспарланып отыр
