Nazarbayev University-дің Тау-кен ісі және Жер туралы ғылымдар мектебі жер қойнауын пайдалану саласындағы тәуелсіз сарапшылардың кәсіби бірлестігі – ПОНЭН және KAZRC қауымдастығымен бірлесе отырып, минералдық ресурстар мен қорлар жөніндегі халықаралық CRIRSCO стандарттарының енгізілуіне 10 жыл толуына арналған семинар ұйымдастырды, деп хабарлайды DKNews.kz.
Шараға 130-дан астам адам – зерттеушілер, өнеркәсіп жетекшілері және халықаралық сарапшылар қатысты. Қатысушылар тау-кен саласының даму бағыттары мен білім беру жүйесіндегі өзгерістерді, сондай-ақ өндіріс пен білім ортасының өзара байланысын, кәсіби шеберлікті жетілдіру және ынтымақтастықты кеңейту жолдарын талқылады.
«Бүгінгі басты міндетіміз – металлургиялық базаны нығайту, аудит пен сараптама үдерістерін жетілдіру, цифрлық технологияларды енгізу және кадр әлеуетін дамыту. Бұл бағытта университеттермен, ғылыми орталықтармен және жер қойнауын пайдаланушылармен әріптестіктің маңызы зор. Мұндай ынтымақтастық жас мамандардың халықаралық стандарттарды меңгеруіне және тәжірибелі сарапшылардың өз білімі мен тәжірибесін бөлісуіне мүмкіндік береді», – деді ҚР Индустрия және құрылыс министрлігі Геология комитетінің төрағасы Ерлан Ақбаров.
PONEN және KAZRC қауымдастығы 2017 жылдан бастап NU Тау-кен ісі және Жер туралы ғылымдар мектебімен бірлесіп жұмыс істейді. Ынтымақтастық нәтижесінде академиялық зерттеулер, кәсіби құзыреттер мен өндірістік тәжірибе арасындағы өзара байланыс күшейді. Бірлескен бастамалар кадр даярлау сапасын арттырып, есептілікті халықаралық стандарттарға (CRIRSCO кодтар жүйесі) сәйкестендіруге және жоғары білікті инженерлерді дайындауға жол ашты.
Соңғы сегіз жылда мектеп тау-кен саласына кен орындарын жобалау, игеру және жабу үдерістерін қауіпсіз әрі тұрақты жүргізе алатын инженерлерді даярлап келеді. Түлектер оқу кезінде жетекші компанияларда тағылымдамадан өтіп, нақты өндірістік міндеттерді шешуге қатысады. 95%-дан астамы оқу бітіргеннен кейін екі ай ішінде өндірістік, сервистік, консалтингтік және мемлекеттік құрылымдарда жұмыс табады. Олардың бәсекеге қабілеттілігі жоғары, себебі олар инженерлік білімді экологиялық жауапкершілікпен және заманауи цифрлық дағдылармен ұштастыра алады (Surpac, Vulcan, Whittle/Minemax, Ventsim, Rocscience, сондай-ақ мұнай-газ бағытында – Petrel, CMG, Eclipse, Landmark).
Академиялық бағдарламалармен қатар, мектеп кәсіби мамандарға арналған біліктілікті арттыру курстарын және мамандандырылған семинарларды өткізеді. Алдағы уақытта жаңа микробіліктілік бағдарламаларын іске қосуды жоспарлап отыр.
«Біз – зерттеуші университетпіз, сондықтан ең алдымен нақты нәтиже әкелетін бірлескен ғылыми жобаларға басымдық береміз. Біздің мақсатымыз – Қазақстан үшін шынайы пайда әкелу. Көптеген қатысушылар қосымша білім беру бағдарламаларын жүзеге асырады, сол себепті келесі оқу жылынан бастап икемді магистратура жүйесін енгізуді жоспарлап отырмыз. Онда блоктық оқу форматы, кешкі және демалыс күнгі сабақтар, сондай-ақ онлайн және офлайн үлгідегі қатысу мүмкіндіктері қарастырылған», – деді NU Тау-кен ісі және Жер туралы ғылымдар мектебінің деканы, профессор Рэнди Хазлетт.
Мектептің қарамағында оннан астам мамандандырылған зертхана бар және олар өндіріс саласына арналған геомеханикалық сынақ қызметтерін ұсынады. Осы құрал-жабдықтарды аккредиттеу аяқталған соң, өнеркәсіппен әріптестік кеңейтіледі деп күтілуде. 2026 жылы университетте сандық егіз технологиясы негізінде виртуалды зертхана іске қосылады. Бұл платформа студенттерге нақты өндірістік нысандарды виртуалды кеңістікте модельдеуге және электрондық микрозонд арқылы минералдарды анықтауға мүмкіндік береді.
