Өткен сенбі күні елордадағы «Алатау» спорт кешенінде ҚР Ұлттық ұланы Бас қолбасшылығының ардагерлер кеңесі Ел егемендігінің жарияланғанына 35 жыл толуына орай суда жүзу жарысын ұйымдастырды, деп хабарлайды DKNews.kz.
Жарысқа әр түрлі жастағы оннан астам ардагер қатысты. Олардың арасында кәсіби жүзушілер де, жасы ұлғайғандықтан бассейнге сирек баратындар да болды. Дегенмен барлығы да жарыстың бәсекелік рухын сезініп, жүзудің әсерінен зор қуат алды. Ұйымдастырушылар жүзуге уақытпен шектеу қоймағандықтан, ең бастысы – ақсақалдар көңіл сергітіп, эмоциялық демалыс алды, бір-бірімен қауышып, жастық шақтарын есіне түсірді.
Бұл жай жүзу ғана емес, бұл – денсаулықты қалпына келтірудің, өз-өзіңе сенімділікті арттырудың, жаңа мақсаттар мен жеңістерге жетудің жолы Дейді жүзу жарысына қатысушы, отставкадағы полковник Алексей Мельников
Әрине, суда жүзу дене бітіміңді шынықтыруға, көңіл-күйіңді сергітуге және өзіңді-өзің бағалауға көмектеседі Деп өз пікірін білдірді жарысқа қатысушы запастағы полковник Талғат Нұрбаев
Іс-шара соңында Ұлттық ұланның Бас қолбасшылығы Ардагерлер кеңесінің төрағасы, отставкадағы полковник Григорий Григорьянц Ішкі істер министрінің орынбасары – Ұлттық ұланның Бас қолбасшысы атынан отставкадағы полковниктер Александр Дучко мен Михаил Юрковецке «Ұлттық ұлан үздігі» төсбелгісін табыс етті. Ал, отставкадағы полковник Виктор Пилипенко мен запастағы подполковник Жақсылық Олжанов «Қоғамдық тәртіпті сақтағаны үшін» төсбелгісімен марапатталды.
Сонымен қатар, Қазақстандық Ішкі істер органдары және Ұлттық ұлан ардагерлер кеңесінің қаулысымен запастағы полковниктер Анатолий Перепелица мен Жанболат Ахметов «Ардагерлер қоғамына қосқан үлесі үшін» медальдарымен марапатталды. Аталған марапат олардың ұйымдағы белсенділігі үшін берілді.
Қоғамдық ұйым төрағасының айтуынша, мұндай іс-шаралар ардагерлерді біріктіріп, оларға жігер мен рухани қуат береді.
Олар өздерін ұмыт қалғандай сезінбейді, әрдайым ұйымның қолдауына сүйеніп, кез-келген мәселелерін айта алады. Біз оларға үнемі көмектесеміз Дейді Григорий Александрович
Қуаныш Қожахметов, Астана қаласы
