Алматының Медеу ауданында экологиялық туристік және спорттық объект құру жоспарлануда, деп хабарлайды DKNews.kz.
«Алматы» ӘКК» АҚ-тың еншілес ұйымы «Almaty Finance» ЖШС, «Adrenaline rides» ЖШС-ге Медеудегі қолданыстағы туристік инфрақұрылымның жанында спорт алаңын және глэмпинг құру жобасын іске асыруға 500 млн теңге бөлді. Қаржыландыру қаланың басым бағыттарының бірі ретінде, табиғатта қауіпсіз және жайлы демалыс пен туризмді дамыту мақсатында «Almaty Business-2025» бағдарламасы шеңберінде жүзеге асырылады. Қарыз бойынша сыйақы мөлшерлемесі жылдық 6% (ЖТСМ) құрайды, қаржыландыру мерзімі – 7 жыл.
Жобаға Зиплайн аттракционы бар спорт алаңы, киім ауыстыратын бөлмелер, спорттық жабдықтарды сақтауға арналған орындар, туристерге қысқа мерзімді тұруға арналған ықшам глэмпинг-үйлері, кофехана, кафе, конгресс холл, сондай-ақ бассейні бар монша кіреді. Объектілер қорғалатын табиғи аумақтарға араласпай, туристер баратын аймақта, «Медеу–Шымбұлақ» аспалы жолының төменгі деңгейінің жанында орналасатын болады. 2025 жылдың 7 қарашасында жоба қоғамдық тыңдаулардан өтті және оны жүзеге асыру үшін мақұлданды.
Жобада экологиялық шешімдерге және қоршаған ортаға минималды әсерге ерекше назар аударылады. Барлық ғимараттарды ландшафтпен үйлесетін жеңіл, табиғи материалдардан жасау жоспарлануда, ал инженерлік шешімдер ауданның табиғи тепе-теңдігін сақтауға бағытталған.
«Жоба шатқалдың табиғи ортасын бұзбай, қала тұрғындары мен қонақтарының белсенді демалысы үшін қосымша мүмкіндіктер жасайды. Сондай-ақ, 20 жаңа жұмыс орнын құруға және қаржыландырудың барлық кезеңінде бюджетке түсетін салық түсімдерін 222 млн теңгеге дейін ұлғайтуға мүмкіндік береді» «Almaty Finance» ЖШС Басқарма төрағасы Ерлан Егембердиев
Құрылыстың аяқталуы 2026 жылдың 4 тоқсанында жоспарланып отыр.
