ҚР ІІМ Ұлттық ұланының спорт командасын даярлау орталығының аға маманы — дене шынықтыру және спорт жөніндегі аға нұсқаушы ефрейтор Әбиба Әбужақынова Абу-Дабиде (БАӘ) өткен Grand Slam сериясындағы дзюдодан ірі халықаралық турнирде қола медаль жеңіп алды, деп хабарлайды DKNews.kz.
Қазақстан құрамасының атынан 48 келіге дейінгі салмақ дәрежесінде өнер көрсеткен ефрейтор Ә. Әбужақынова іріктеу жекпе-жегінен сенімді түрде өтіп, қола үшін шешуші жекпе-жекке шығып, Испаниядан келген Ева Перес Солермен кездесті.
Қарқынды және серпінді додада біздің спортшы жеңіске жетіп, жоғары дайындық деңгейін, өзіндік мінезін және тактикалық сенімділігін көрсетті.
Абиба Әбужақынова ойдағыдай өнер көрсетуінің арқасында тұғырдың үшінші сатысына көтеріліп, турнирдің бірінші күні финалдық блокқа жеткен Қазақстанның жалғыз өкілі болды.
Қазақстандық спортшының жетістігі ҚР ІІМ Ұлттық ұланындағы спорттық дайындықтың жоғары деңгейінің және оның халықаралық аренада қазақстандық дзюдоны дамытуға қосқан елеулі үлесінің жарқын дәлелі болды.
