1996 жылғы 30 қарашада қорғаныс ведомствосы басшысының құқықтық қызмет құру туралы директивасы шығарылып, кейін ол Қорғаныс министрлігінің Заң департаменті болып қайта құрылды, деп хабарлайды DKNews.kz.
Бұл сала мамандары қорғанысты ұйымдастыру, әскери қызметті өткеру тәртібі, әскери қызметшілерді, олардың отбасы мүшелерін, азаматтық персонал және әскери зейнеткерлерді әлеуметтік қамтамасыз ету мәселелері бойынша нормативтік-құқықтық актілерді әзірлейді. Олар заңнаманы тұрақты түрде мониторингтен өткізіп, тиімді емес, қайталанатын нормалар мен заңдағы олқылықтарды анықтайды.
Осы жылы Мемлекет басшысы Қарулы күштердің мүдделеріне қатысты бірқатар заң актілеріне қол қойды. Бұлардың әзірленуінде, құқықтық сараптамасында, толықтырулар мен өзгерістер енгізуде әскери заңгерлердің еңбегі зор. Заң актілері резервтегі әскери қызмет тәртібі, әскери-патриоттық тәрбие, аумақтық қорғаныс, мемлекеттік қызмет, бюджет, азаматтық қорғау, тұрғын үй қатынастары және қылмыстық заңнаманы оңтайландыру сияқты маңызды мәселелерді қамтиды.
Аумақтық қорғанысқа қатысты азаматтарды дайындау және өз аумағын сыртқы қауіптерден қорғау мақсатындағы құқықтық институтты қалыптастыруда жасалған маңызды қадам – Қазақстан Республикасының «Аумақтық қорғаныс туралы» Заңын қабылдау болды. Онда аумақтық қорғаныс құқықтық реттеудің жеке саласы ретінде анықталып, Президент, Үкімет, орталық мемлекеттік органдар мен ұйымдардың құзыреттері бекітілді. Одан бөлек Қорғаныс министрлігінің аталмыш салада мемлекеттік органдар мен ұйымдарды бақылау механизміне жауапты болуы да заңмен белгіленді.
Әскери заңгерлер әскери-патриоттық тәрбие мәселелері бойынша және резервтегі әскери қызмет пен кейбір орталық мемлекеттік органдардың функцияларын қайта бөлу жөніндегі заңдарға өзгерістер мен толықтырулар енгізу жұмысында айтарлықтай еңбек атқарды.
Аталған нормативтік-құқықтық актілердің қабылдануы ел басшылығының тапсырмаларын және Қорғаныс министрлігінің заңнамалық бастамаларын жүзеге асыруға мүмкіндік берді. Сол сияқты бір жыл ішінде Қорғаныс министрлігінің мүдделерін қорғау барысында әскери заңгерлер 1200-ден астам талап арыз түсіріп, шамамен 4 млрд теңге өндіріп алды және бюджетте 11 млрд теңгеден көп қаржыны сақтап қалды.
Әскери заңгер қызметінің ерекшелігі халықаралық және ұлттық заңнаманы, әскери саланы терең білуге, түрлі құқық салаларында кешенді және жүйелі тәсілдермен әрекет етуге қабілеттілікті талап етеді. Әскери заңгерлердің жан-жақты құзыреті, талдау жасау қабілеті, мейлінше мұқият болуы, принциптілік пен жауапкершілік сынды қасиеттері елдің қорғаныс қабілетін нығайту және әскери қызметшілердің әлеуметтік қорғалуын қамтамасыз ететін міндеттерді лайықты орындауға мүмкіндік береді.
