Ақмола облысы бойынша мемлекеттік қызмет істері департаменті мемлекеттік қызметшілердің бұзылған құқықтарын қалпына келтіру бөлігінде 2025 жылдың 11 айындағы қызметінің қорытындысын шығарды, деп хабарлайды DKNews.kz.
Осылайша, Департамент жүргізіп жатқан жұмыс аясында 606 мемлекеттік қызметшінің құқықтары қалпына келтірілді. Тәжірибе көрсеткендей, қызметкерлерді қосымша жұмыс уақытына тарту кезінде бұзушылықтарға жол беріледі, бұл қызметкер жазбаша келісім мен жұмыс берушінің тиісті актісі болмаған кезде жұмыстан тыс уақытта жұмысқа тартылған 214 бұзушылық фактісімен дәлелденеді.
Департаменттің талаптары негізінде аталған адамдарға жалпы ұзақтығы 330 сағаттан астам демалыс берілді.
Мемлекеттік қызметшілерге тәртіптік жаза қолдану тәртібін жүйелі бұзушылықтар анықталды, Департамент жүргізген жұмыстың қорытындысы бойынша жаза қолдану туралы 29 актінің күші жойылды.
Демалыс және мереке күндері кезекшілікке заңсыз тарту жағдайлары бар, ол кезекшілік кестесінің негізінде жүзеге асырылды. Бұл ретте кезекшілік жазбаша келісімінсіз жүзеге асырылды, демалыс және мереке күндері жұмыс үшін ақы төленбеді.
Департамент хатының негізінде қызметшілерге 23372 теңге көлемінде өтемақы төленді.
Сонымен қатар, Департамент қызметкерлерді іссапарға жіберу кезінде заңнаманың сақталуына жүргізілген талдау қорытындылары көрсеткендей, мемлекеттік органдарда қызметшілердің құқықтары жүйелі түрде бұзылады, олардың көпшілігінде бұзушылықтар іссапар шығындарын толық емес көлемде өтеумен байланысты, ал кейбір жағдайларда олар бюджет қаражатының болмауына байланысты мүлдем төленбейді.
Департамент қабылдаған шаралардың қорытындысы бойынша 223 қызметшіге 10 595 042 теңге сомасына іссапар шығыстары төленді.
Сонымен қатар, Департамент мемлекеттік қызметшілерге жыл сайынғы еңбек демалыстарын уақтылы төлемеудің 91 фактісін анықтады, осыған байланысты аталған адамдарға Департаменттердің талабы бойынша жалпы сомасы 128882 теңгеден астам демалысты уақтылы төлемегені үшін өсімпұл төленді.
Қабылданып жатқан шаралар еңбек бұзушылықтарының санын қысқартуға, сол арқылы мемлекеттік қызметшілердің құқықтары мен заңды мүдделерін қорғауды іске асыруды қамтамасыз етуге мүмкіндік береді.
