Қарағандыда есірткінің заңсыз айналымы мен контрабандасына қатысты резонансты іс бойынша сот үкімі шықты. Іс фигуранты – колледж студенті. Тергеу мәліметінше, ол қала ішінде есірткі таратумен қатар, шетелден тыйым салынған заттарды жеткізуді ұйымдастырған, деп хабарлайды DKNews.kz.
Тергеуді Қарағанды облысы бойынша Қаржылық мониторинг агенттігінің департаменті жүргізді. Тергеу барысы Бас көлік прокуратурасының үйлестіруімен өткен.
Telegram-дағы хат алмасудан қаладағы ондаған «жасыру орнына» дейін
Тергеу деректеріне сәйкес, жас жігіт есірткі тарату арқылы табыс табуға болатынын біліп, Telegram мессенджері арқылы белгісіз «куратормен» байланыс орнатқан. Ол «курьер-закладчик» және бір мезгілде «қойма» рөлін атқаруға келіскен.
Оның міндетіне координаталар арқылы есірткі алу, сақтау, бөлшектеу, тасымалдау және Қарағанды қаласының аумағында жасырын орындарға қалдыру кірген. Тергеу күн сайын шамамен 30 «закладка» жасағанын анықтады.
Таиландтан контрабанда және кәмелетке толмағанды тарту
Айыпталушы мұнымен шектелмей, Таиландтан халықаралық пошта арқылы есірткі жеткізуді ұйымдастырған. Ол бұл іске Telegram арқылы кәмелетке толмаған дропперді тартқан.
400 мың теңге сыйақы үшін жасөспірім посылканы өз атына рәсімдеген. Алайда жіберілімді алу сәтінде күдікті ұсталды.
Пошта сәлемдемесінен 909 грамм каннабис экстракты табылып, тәркіленді.
Тінту кезінде не табылды
Күдікті ұсталғаннан кейін оның тұрғылықты жерінде тінту жүргізілді. Үйінен қосымша 80 грамм есірткі заты табылды.
Сондай-ақ ұялы телефонын тексеру барысында оның ұсталар алдындағы күні бірнеше «закладка» қалдырғаны белгілі болды. Көрсетілген координаталар бойынша тағы 3,34 грамм каннабис экстракты тәркіленді.
Сот үкімі
Сот айыпталушыны есірткінің заңсыз айналымы мен контрабандасы бойынша кінәлі деп таныды. Оған 15 жыл бас бостандығынан айыру жазасы тағайындалды.
Үкім заңды күшіне әлі енген жоқ.
