Алматы 2025 жылы демографиялық өсімнің жоғары қарқынын тағы бір мәрте көрсетті. Үлкен қалаға тән қарбалас өмір ырғағына қарамастан, мегаполисте отбасын құрып, бала сүюге деген ұмтылыс бәсеңдеген жоқ. Ресми деректерге сәйкес, бір жыл ішінде Алматыда 40 846 нәресте өмірге келген, деп хабарлайды DKNews.kz.
Бұл көрсеткіштің ішінде көпшіліктің назарын аударатын тағы бір маңызды жайт бар. Қалада шамамен 300-ге жуық егіз сәби дүниеге келсе, үш отбасында бірден үшем туғаны тіркелген. Соңғы жылдардағы үрдіс Алматының республика бойынша егіздердің тууы жағынан тұрақты түрде алдыңғы қатарда келе жатқанын көрсетіп отыр.
Егіздер ең көп қай аудандарда туды
Статистикаға көз жүгіртсек, егіздердің ең көп тууы Алатау ауданында байқалған. Бұл ауданда 62 егіз сәби өмір есігін ашқан. Одан кейін Түрксіб ауданы тұр - мұнда 45 егіз және бір үшем дүниеге келген.
Алдыңғы қатардан Наурызбай ауданы да көрінді. Бұл ауданда 42 егіз және бір үшем тіркелген. Сонымен қатар Медеу ауданында 36 егіз және бір үшем, Бостандық ауданында 33 егіз, Әуезов ауданында 30 егіз, Алмалы ауданында 27 егіз, ал Жетісу ауданында 23 егіз сәби туған.
Бұл деректер демографиялық өсімнің тек бір ауданмен шектелмей, бүкіл қала аумағында біркелкі жүріп жатқанын аңғартады.
Баланың тууын тіркеу қалай жеңілдеді
Соңғы жылдары мемлекеттік қызметтердің цифрлануы жас отбасылар үшін үлкен қолайлылық туғызды. Бүгінде баланың тууын тіркеу бірнеше тәсіл арқылы жүзеге асырылады және бұл үшін міндетті түрде мекемелерді аралау талап етілмейді.
Проактивті форматтағы қызмет соның айқын мысалы. Бала дүниеге келгеннен кейін бір тәулік ішінде ананың телефон нөміріне 1414 қысқа нөмірінен құттықтау SMS-хабарлама келеді. Хабарламада қажетті деректерді растау ұсынылады, ал қалған рәсімдер автоматты түрде жүргізіледі.
Бұдан бөлек, баланың тууын екінші деңгейлі банктердің мобильді қосымшалары арқылы, электронды үкімет порталы көмегімен немесе дәстүрлі түрде Халыққа қызмет көрсету орталықтарында тіркеуге болады. Бұл әсіресе алғашқы күндері сәбиіне бар уақытын бөлгісі келетін ата-аналар үшін маңызды.
Мемлекеттік қолдау қалай көрсетіледі
Мемлекет тарапынан жаңа туған балаға біржолғы жәрдемақы төлеу қарастырылған. Бірінші, екінші және үшінші балаға 38 айлық есептік көрсеткіш мөлшерінде төлем жасалады. Ал төртінші және одан кейінгі балалар үшін жәрдемақы 63 АЕК-ке дейін ұлғаяды.
Маңыздысы – егіздер, үшем немесе төртем дүниеге келген жағдайда жәрдемақы әр балаға жеке-жеке төленеді. Бұл көпбалалы немесе бірден бірнеше сәби сүйген отбасыларға алғашқы кезеңде едәуір қаржылық демеу болады.
Алматының демографиялық ерекшелігі
Сарапшылардың айтуынша, Алматыдағы жоғары туу көрсеткіштері қаланың медицина, әлеуметтік қолдау және цифрлық қызметтер тұрғысынан дамығанын көрсетеді. Перинаталдық орталықтардың қолжетімділігі мен қызмет сапасы, сондай-ақ жас отбасыларға арналған қолдау шаралары демографиялық өсімге оң әсерін тигізіп отыр.
Алматы соңғы жылдары тек экономикалық және мәдени орталық қана емес, жаңа ұрпақ қалыптасып жатқан үлкен отбасы қаласы ретінде де өз орнын нығайта түсуде.
