Астанада Е. Рахмадиев атындағы мемлекеттік академиялық филармонияның камералық залында қазақтың күйші-композиторы Дина Нұрпейісованың 165 жылдығына арналған «Күй анасы – Дина» атты концерт өтті. Кеш елорда мәдени өміріндегі маңызды оқиғалардың біріне айналды, деп хабарлайды DKNews.kz.
Күй арқылы өрілген рухани кеш
Концерт барысында көрермендер Дина Нұрпейісованың бай шығармашылық мұрасымен қайта қауышты. Күй кеші ұлы күйшінің өмірі мен өнер жолына, қазақ күй дәстүріндегі орнына арналды.
«Дина Нұрпейісованың 165 жылдығына орай Е. Рахмадиев атындағы мемлекеттік академиялық филармониясының Қазақ оркестрі арнайы күй кешін өткізді. 31 қаңтар – ұлы күйшінің өмірден өткен күні, сондықтан концерттің дәл осы күні өтуі символдық мәнге ие», – деді Қазақ оркестрінің дирижері, мәдениет қайраткері Нұрлан Бекенов.
Жаңа формат, жаңа тыныс
Кештің ерекшелігі – классикалық күйлердің жаңаша ұсынылуы. Динаның «Тойбастар» күйі жаңа форматта қайта жазылып, заманауи өңдеумен тыңдарманға жол тартты. Сонымен қатар «Жеңіс» пен «Кербез» күйлері алғаш рет орындалып, көрермен тарапынан жылы қабылданды.
Бұл жаңашыл қадамдар дәстүрлі күй өнерінің бүгінгі тыңдарманмен үндесе алатынын көрсетті.
Ұстаз бен шәкірт сабақтастығы
Концерт бағдарламасында Дина Нұрпейісова мен оның ұстазы Құрманғазы Сағырбайұлының әйгілі күйлері орын алды. Қазақ оркестрі «Әсем қоңыр», «Бұлбұл», «Науысқы», «Қайран шешем», «Сарыарқа», «16-жыл» сияқты шығармаларды орындап, ұлттық өнердің терең философиясын сахнада айшықтады.
Бұл күйлер қазақ халқының тарихын, тағдырлы кезеңдерін, рухани болмысын күй тілімен жеткізді.
Мұраға тағзым
«Күй анасы – Дина» концерті – тек мерейтойлық шара емес, қазақ күй өнеріне, оның ірі тұлғаларына көрсетілген құрметтің көрінісі болды. Кеш арқылы Дина Нұрпейісованың өнері жаңа буын тыңдарманға қайта жол тапты.
