Елордада ҚР ІІМ Ұлттық ұланының 5573 әскери бөлімінің әскери қызметшілері қоғамдық тәртіпті қамтамасыз ету барысында есірткіге қатысты қылмыстың жолын кесті. Оқиға Байқоңыр ауданында күнделікті патрульдеу кезінде тіркелді, деп хабарлайды DKNews.kz.
Қала көшелерін аралау кезінде әскери жасақ бастығы қатардағы Дәурен Өмірбек пен патрульдеушілер — қатардағы Дәуір Әшімбек пен Досымжан Дәулетхан — күмән тудырған әрекетке назар аударған. Көліктен түскен екі азамат айналасына жалтақтап қарап, қардың астынан белгісіз затты алып, оқиға орнынан тез кетуге тырысқан.
Жедел әрекет
Жағдайды бірден бағалаған ұландықтар күдіктілерді қууға кірісіп, олардың бірін оқиға орнында ұстады. Қалған екі адам қашып үлгерген.
Оқиға туралы дереу әскери жасақтың кезекшісіне хабар берілді. Кейін кезекші 102 нөмірі арқылы полиция қызметкерлерін шақырған.
Тергеу басталды
Аталған дерек бойынша материалдар тергеу-жедел тобына тапсырылды. Ұсталған азамат заңнама талаптарына сәйкес уақытша ұстау изоляторына қамалды. Қазіргі уақытта оқиғаның барлық мән-жайы анықталып жатыр.
Қоғамдық қауіпсіздік жолындағы қызмет
Бұл жағдай Ұлттық ұлан әскери қызметшілерінің кәсіби даярлығы мен қырағылығын тағы бір мәрте көрсетті. Қоғамдық тәртіпті күн сайын қамтамасыз етіп жүрген ұландықтар есірткінің заңсыз айналымына қарсы күресте маңызды рөл атқарып келеді.
Айта кетейік, 2025 жылы есірткі заттарын заңсыз сақтау және тасымалдау бойынша 56 дерек дәл осы құқықтық тәртіп әскерлерінің көмегімен анықталып, тіркелген.
