Премьер-министр Олжас Бектенов 10 ақпанда өткен Үкіметтің кеңейтілген отырысынан кейін Мемлекет басшысы жүктеген тапсырмаларды жүзеге асыру мәселелері бойынша арнайы кеңес өткізді. Кеңесте экономиканың барлық негізгі бағыты қамтылып, нақты мерзімдер мен жауапты органдар айқындалды, деп хабарлайды DKNews.kz.
«Мемлекет адам үшін» қағидаты – басты бағдар
Олжас Бектенов Конституциялық реформаның мәніне тоқталып, жаңа жобада «адам мемлекет үшін емес, мемлекет адам үшін» қағидаты айқын көрініс тапқанын атап өтті.
«Президентіміз атап өткендей, жаңа Конституция жобасында “адам мемлекет үшін емес, мемлекет адам үшін” қағидаты айқындала түскен. Конституциялық реформаның көздеген мақсаты да осы – ауқымды саяси жаңғырумен қатар, экономиканың сапалы өсу қарқынын арттыра түсуге бағытталып отыр. Яғни, бірінші кезекте, халықтың табысы мен әл-ауқатын арттыруға басымдық берілуге тиіс. Бұл – біздің алдымызда тұрған аса маңызды міндет», — деді Премьер-министр.
Экономикалық блок: инфляция, табыс, цифрлық теңге
Ұлттық экономика министрлігі мен Ұлттық банк инфляцияны 9–11 пайызға дейін төмендету жоспарын әзірлемек. 1 мамырға дейін 2026–2029 жылдарға арналған халық табысын арттыру бағдарламасы қабылданады.
Үкімет экономикалық блокта келесі бағыттарды күшейтуді тапсырды:
-
инфляцияны қадағалау және баға тұрақтылығын қамтамасыз ету
-
бизнес шығындарын азайту
-
тауар нарықтарындағы бәсекелестікті дамыту
-
цифрлық теңгені түрлі салаларда кеңінен енгізу
Қаржы министрлігіне 1 мамырға дейін бюджеттік бағдарламаларға жан-жақты тексеру жүргізу міндеті жүктелді.
Цифрландыру: QazTech, Data Lake және KazLLM
Жасанды интеллект және цифрлық даму министрлігіне ақпараттық жүйелерді QazTech платформасына көшіру жоспарын 10 күн ішінде бекіту тапсырылды. Сонымен қатар:
-
мемлекеттік Data Lake жүйелерін қалыптастыру
-
KazLLM тілдік моделін практикада кеңейту
-
Tasqyn және Talsim жүйелерін интеграциялау
-
Цифрландыруды қаржыландыру қорын 1 қазанға дейін толық іске қосу
Мемлекеттік қызметтерді цифрландыру нәтижесінде ХҚКО-ға келушілер саны 2,3 млн-ға қысқарғаны айтылды.
Энергетика: 13,3 ГВт жаңа қуат
2029 жылға дейін 13,3 ГВт жаңа энергетикалық қуат іске қосылады. 20 ақпанға дейін Көмір генерациясы жөніндегі ұлттық жоспардың жобасы Үкіметке енгізіледі.
Үкімет Батыс аймақты Біртұтас энергетикалық жүйемен біріктіруді 2027 жылдың соңына дейін аяқтауды тапсырды.
Өнеркәсіп және инвестиция
АЭА-ларды трансформациялау, терең өңдеуді дамыту және полимерлік өнімдер өндірісін кеңейту бойынша ұсыныстар бір ай ішінде енгізілуі тиіс.
Инвестициялық саясатта:
-
2030 жылға дейін негізгі капиталға инвестициялар бойынша нысаналы индикаторлар әзірлеу
-
басым жобалар пулын қалыптастыру
-
инвестициядан кейінгі мониторингті күшейту
-
жеке инвестиция үлесін арттыру
Көлік: транзитті 55 млн тоннаға жеткізу
2026 жылы транзит көлемін 55 млн тоннаға дейін арттыру жоспарланған. Теміржол және автожол жобалары бойынша нақты мерзімдер белгіленді.
Smart Cargo платформасын осы жылдың соңына дейін барлық мемлекеттік цифрлық жүйелермен интеграциялау міндеті қойылды.
Ауыл шаруашылығы және АӨК
Ауыл шаруашылығы министрлігіне:
-
15 сәуірге дейін ветеринарияны дамытудың кешенді жоспарын енгізу
-
1 маусымға дейін Ауыл шаруашылығы кооперациясы туралы заң жобасын әзірлеу
-
1 қыркүйекке дейін АӨК ақпараттық жүйесінің толыққанды жұмысын қамтамасыз ету
Білім, денсаулық және әлеуметтік қолдау
Білім беру жүйесінде бюджет қаражатын пайдалану тиімділігін арттыру бойынша ұсыныстар бір ай ішінде дайындалады.
Денсаулық сақтау саласында 1 сәуірге дейін Медициналық деректердің бірыңғай қоймасы енгізіледі. Әлеуметтік қолдауда Отбасының цифрлық картасы және «Әлеуметтік әмиян» жүйесі кеңейтіледі.
Кәсіптерді трансформациялаудың ұлттық орталығын 1 сәуірге дейін құру тапсырылды.
«Ойлануға уақыт жоқ»
Жиын қорытындысында Премьер-министр нақты нәтиже талап етілетінін қатаң ескертті.
«Көріп отырғанымыздай, алдымызда тұрған мақсат-міндеттердің ауқымы өте үлкен. Мемлекет басшысы атап өткендей ойланып-толғануға уақыт жоқ. Батыл, тиімді шешім қабылдап, оны жедел жүзеге асыру қажет. Тағы да қайталап айтамын, халықтың табысы мен әл-ауқатын арттыру – атқарылатын жұмыстың нақты нәтижесі болуға тиіс», — деді Олжас Бектенов.
Үкіметтің алдына қойылған міндеттердің ауқымы кең, мерзімдері нақты. Ендігі басты талап – сапалы әрі уақтылы орындалу.
