Соңғы күндері әлеуметтік желілерде Burger King Kazakhstan компаниясының қызметкері Әлібек Қаратайға қатысты жағдай қызу талқыланып жатыр. Әртүрлі пікір, эмоциялық реакциялар мен жорамалды нұсқалар тарап жатыр. Алайда мұндай сәтте ең маңыздысы - нақты дерек пен ресми ұстаным, деп хабарлайды DKNews.kz.
Компания қоғамдағы резонансқа байланысты түсіндірме берді.
Жұмыстан шығарылды ма?
Burger King Kazakhstan мәліметінше, қазіргі таңда Әлібек Қаратай жұмыстан шығарылған жоқ және компания қызметкері болып қала береді.
«Қазіргі таңда Әлібек Қаратай жұмыстан шығарылған жоқ және Burger King Kazakhstan компаниясының қызметкері болып табылады. Компания онымен еңбек қатынастарын тоқтату туралы шешім қабылдаған жоқ».
Бұл - әлеуметтік желілерде тараған «жұмыстан босатылды» деген ақпараттың шындыққа сәйкес келмейтінін білдіреді.
Оқиға қалай өрбіді?
2026 жылғы 29 қаңтарда HR департаментіне қызметкердің демалыс ресімдеу ниеті туралы хабарлама түскен. Осыдан кейін Әлібек жұмысқа уақытша шықпаған. Алайда белгіленген нысандағы ресми өтініш компанияға берілмеген.
6 ақпанда қызметкердің анасы Жанат Қаратай компанияға өз атынан жазылған еңбек қатынастарын тоқтату туралы өтініш табыстаған.
Компания Қазақстан Республикасының еңбек заңнамасына сүйене отырып, мұндай өтінішті қызметкердің өзі тікелей рәсімдеуі қажет екенін атап өтті.
Компанияның ұстанымы
Burger King Kazakhstan диалогқа дайын екенін мәлімдеді.
«Компания тарапынан жағдайды шешудің мүмкін жолдары, соның ішінде басқа мейрамханаға ауысу ұсынылды. Біз диалогқа ашық болып қала береміз және қызметкердің өзінің және оның отбасының қатысуымен келесі қадамдарды сындарлы жұмыс форматында талқылауға дайынбыз».
Компания өз қағидаттарына да тоқталды:
«Burger King Kazakhstan құрметтеу, тең мүмкіндіктер және кемсітушілікке жол бермеу қағидаттарынан айнымайды. Инклюзивтілік біздің корпоративтік мәдениетіміздің маңызды бөлігі болып табылады. Осы орайда қауіпсіздік, гигиена және қонақтар мен қызметкерлердің жайлылығы да басымдық болып табылатыны сөзсіз».
Ішкі тексеріс жүргізілуде
Қазіргі уақытта компания ішкі тексеріс жүргізіп, ұжым ішіндегі өзара әрекеттесу процестерін талдауда. Мақсат - барлық стандарттардың сақталуын қамтамасыз ету және әр қызметкерге қолайлы еңбек жағдайын қалыптастыру.
Компания қоғамға үндеу жасады:
«Біз жұртшылықтан асығыс қорытынды жасамауын және расталған фактілерге сүйенуін сұраймыз. Burger King Kazakhstan ашық және құрметпен қарауға негізделген диалог жүргізуге дайын».
Әлеуметтік желілер дәуірінде кез келген жұмыс жағдайы бірнеше сағат ішінде қоғамдық талқылауға айналуы мүмкін. Бірақ мұндай сәтте эмоция емес, факт шешуші рөл атқарады.
Қазір бастысы - заң талаптары мен нақты деректерге сүйене отырып, мәселені диалог арқылы шешу.
