Премьер-министр Олжас Бектенов Астана қаласына жұмыс сапары барысында Президенттің экономиканы әртараптандыру және технологиялық инфрақұрылымды дамыту жөніндегі тапсырмалары аясында елорданың негізгі индустриялық және цифрлық жобаларының іске асырылу барысымен танысты. Сапар кезінде өндірістік әлеуетті нығайтуға, жаңа технологияларды енгізуге және қаланың цифрлық жүйелерінің тұрақтылығын арттыруға ерекше назар аударылды, деп хабарлайды DKNews.kz.
Елорда өнеркәсібі негізінен өңдеу секторынан тұрады
2025 жылдың қорытындысы бойынша Астанада өнеркәсіп өндірісінің көлемі 3,4 трлн теңгеден асты. Кәсіпорындардың негізгі бөлігі №1 Индустриялық парк аумағында шоғырланған. Жалпы өндірістік портфель құны 333,3 млрд теңге болатын 137 жобаны қамтиды және оларда 9,5 мыңнан астам жұмыс орнын құру көзделген.
Жаңа машина жасау зауыты іске қосылды
Сапар барысында Премьер-министр «Автокомпоненты KZ» ЖШС зауытының қызметімен танысты. Кәсіпорын 2025 жылдың қаңтарында іске қосылған және жобаны жүзеге асыруға 5,1 млрд теңгеден астам жеке инвестиция салынған. Зауыт Кәсіпкерлікті дамыту қорының қолдауына ие болды.
Кәсіпорынның жобалық қуаты жылына 400 бірлік техникаға дейін жетеді. Мұнда өрт сөндіру автоцистерналары, вахталық фургондар және коммуналдық-жол машиналары шығарылады. Өнімдер Төтенше жағдайлар министрлігі мен коммуналдық қызметтердің қажеттіліктеріне жеткізіледі. 2026–2028 жылдары қызметкерлер санын 200 адамға дейін арттыру жоспарланып отыр.
Локализация мен өндіріс көлемі кеңейтіледі
Премьер-министр өндірістік циклдің негізгі учаскелерін аралап, өнім түрлерін көбейту және жергілікті құрам үлесін арттыру бағытындағы жұмыстармен танысты. Олжас Бектенов отандық машина жасау саласы индустрияландырудың және өнімділігі жоғары жұмыс орындарын құрудың басты драйверлерінің бірі екенін атап өтті.
«Өңдеу өнеркәсібінің өсуі экономиканы әртараптандыруға және отандық өндірістің бәсекеге қабілеттілігін арттыруға тікелей әсер етеді. Президент Қасым-Жомарт Тоқаев атап өткендей, біз ел ішінде көбірек өнім өндіруіміз керек. Үкімет өндіріс пен локализацияны қамтамасыз ететін кәсіпорындарға инфрақұрылым, кадр даярлау және нақты тапсырыс тетіктері арқылы қолдау көрсетеді», – деді Премьер-министр.
Астанада алғашқы қалалық дата-орталық іске қосылған
Олжас Бектенов сондай-ақ Astana Smart City жобасы аясында құрылған Деректерді өңдеу орталығына барды. Бұл Қазақстандағы қалалық инфрақұрылым қажеттіліктеріне арнайы салынған алғашқы дата-орталық болып саналады. Нысан халықаралық Presight компаниясы мен қала әкімдігінің серіктестігі негізінде ашылған.
Орталық базасында қалалық ахуалдық орталық, бейнеталдау жүйелері, жасанды интеллект платформалары және қаланы басқаруға арналған цифрлық сервистер жұмыс істейді. Дата-орталық халықаралық ақпараттық қауіпсіздік стандарттарына сәйкес келеді және маңызды цифрлық жүйелердің тұрақтылығын қамтамасыз етеді.
Индустрия мен цифрландыру экономикалық өсімнің негізі болмақ
Жұмыс сапарының қорытындысы бойынша Премьер-министр өнеркәсіптік базаны дамыту және цифрлық инфрақұрылымды нығайту жобаларын одан әрі жалғастыруды тапсырды. Сонымен қатар тұрақты экономикалық өсімді қамтамасыз ету және азаматтардың өмір сапасын арттыру үшін индустриялық және технологиялық шешімдерді интеграциялау қажеттігі атап өтілді.
