ҚР ауыл шаруашылығы министрі Айдарбек Сапаров Үкімет отырысында ауыл шаруашылығы өнімдерін өңдеуді кеңейту және тереңдету бойынша қабылданып жатқан шаралар туралы баяндады, деп хабарлайды DKNews.kz.
Министрдің айтуынша, қазіргі уақытта қайта өңдеу саласы тұрақты өсім көрсетіп, агроөнеркәсіп кешенінің маңызды бағыттарының біріне айналып отыр.
Негізгі көрсеткіштер айтарлықтай өсті
Айдарбек Сапаров 2025 жылдың қорытындысы бойынша саладағы негізгі нәтижелерге тоқталды.
Атап айтқанда:
- азық-түлік өндірісінің көлемі 3,9 трлн теңгені құрады, бұл 2024 жылмен салыстырғанда 8,1%-ға жоғары;
- негізгі капиталға салынған инвестициялар екі есеге өсіп, 389,4 млрд теңгеге жетті;
- 2025 жылдың 11 айында өңделген өнім экспорты $3,2 млрд болды, бұл өткен жылдың сәйкес кезеңінен 33,8%-ға артық.
Өңделген өнімнің үлесі артты
Министрдің мәліметінше, агроөнеркәсіп кешені экспортының жалпы көлеміндегі өңделген өнімнің үлесі бүгінде 52%-ды құрайды.
— Мұның бәрі өндірісті әртараптандыруға және қосылған құны жоғары өнім үлесін арттыруға бағытталған жүйелі жұмыстың нәтижесі, — деді Айдарбек Сапаров.
