Биыл қаңтар айында Ұлттық қауіпсіздік комитеті шет мемлекеттің құзыретті органдарымен бірлесіп халықаралық есірткіге қарсы операция жүргізді, деп хабарлайды DKNews.kz.
Арнайы іс-шаралар барысында Алматы қаласында синтетикалық есірткі затын алу кезінде Қазақстан азаматы ұсталды.
Ірі көлемдегі есірткі тәркіленді
Операция нәтижесінде 8 килограмм синтетикалық метамфетамин тәркіленді. Бұл аса ірі көлемдегі есірткі санатына жатады.
Күдікті дәл осы затты алу сәтінде қолға түскен.
Қылмыстық іс қозғалды
Аталған факт бойынша Қылмыстық кодекстің 297-бабының 3-бөлігі бойынша сотқа дейінгі тергеп-тексеру жүргізілуде.
Сот санкциясымен күдіктіге қатысты қамауда ұстау түріндегі бұлтартпау шарасы қолданылды.
Тергеу мәліметтері жарияланбайды
Қылмыстық-процестік кодекстің 201-бабына сәйкес өзге ақпарат жария етуге жатпайды.
Құқық қорғау органдары есірткіге қарсы күрес бағытындағы жұмыстарды жалғастырып жатқанын атап өтті.
