Үкіметте Премьер-министрдің орынбасары – ұлттық экономика министрі Серік Жұманғариннің төрағалығымен Сыртқы сауда және халықаралық экономикалық ұйымдарға қатысу мәселелері жөніндегі ведомствоаралық комиссияның отырысы өтті, деп хабарлайды DKNews.kz.
Жиында еліміздің азық-түлік қауіпсіздігіне әсер ететін негізгі мәселелер талқыланды. Экспорт пен импортқа қатысты бірқатар шешім қабылданды.
Картоп экспортына шектеу енгізілмейді
Комиссия ішкі нарықтағы бағаның тұрақтанғанын атап өтті. Елде картоп қоры жеткілікті екені айтылды.
Осыны ескере отырып, картоп экспортына уақытша шектеу енгізудің орынсыз екені туралы шешім қабылданды.
Сиыр етін экспорттауға квота алу талаптары жеңілдетіледі
Сиыр етін экспорттаушыларға квота беру тетігін жеңілдету жоспарланып отыр.
Қазіргі талаптарға сәйкес кәсіпорында кемінде 5 мың басқа арналған жеке бордақылау алаңы болуы тиіс. Өзінің ет комбинаты болуы қажет.
Комиссия бұл талаптарды қайта қарау қажеттігін атап өтті.
Ауыл шаруашылығы министрлігі квота беру ережелеріне өзгерістер енгізеді.
Бұл шаралар Мал шаруашылығын дамытудың кешенді жоспары аясында жүзеге асады. Бағдарлама ірі қара мал санын 7,9 млн-нан 12 млн басқа дейін арттыруды көздейді. Сонымен қатар сиыр етінің экспорттық әлеуетін күшейту жоспарланған.
Аналық малды экспорттауға тыйым ұзартылды
Ішкі нарықты қорғау мақсатында бірқатар шектеулер сақталады.
Қазақстаннан ірі қара мен ұсақ малдың аналық басын әкетуге тыйым ұзартылды. ІҚМ бұқашықтарын экспорттауға да шектеу сақталады.
Бұл тыйым ЕАЭО елдеріне де қатысты болады.
ЕАЭО елдерінен жұмыртқа импорттауға шектеу енгізіледі
Комиссия тағы бір маңызды шешім қабылдады.
Алты ай мерзімге дейін тауық жұмыртқасын ЕАЭО елдерінен импорттауға тыйым салынады.
Қазіргі уақытта Қазақстанда 70 құс фабрикасы жұмыс істейді.
34 фабрика жұмыртқа өндіреді. 29 фабрика ет өндіреді. 7 фабрика асыл тұқымды құс өсіреді.
2025 жылдың қорытындысы бойынша елімізде жұмыртқа өндірісі 2,4%-ға өсті. Жалпы көлемі 4 568,5 млн данаға жетті. Ішкі нарықтағы отандық өнімнің үлесі 98%-ды құрады.
Тиісті бұйрықты Ауыл шаруашылығы министрлігі қабылдайды.
Теміржол бөлшектерінің импортына тыйым салынбайды
Отырыста теміржол жылжымалы құрамына арналған бөлшектерді импорттау мәселесі де қаралды.
Үшінші елдерден теміржол бөлшектерін импорттауға тыйым салу ұсынысы талқыланды.
Алайда комиссия мұндай шектеу енгізудің орынсыз екенін айтты.
Сонымен бірге «Қазақстан темір жолы» компаниясына сатып алулар кезінде отандық өндірушілерге басымдық беру тапсырылды.
