Astana Hub жасанды интеллект саласындағы стартаптарды дамытуға арналған AI’preneurs акселерациялық бағдарламасының төртінші легіне өтінім қабылдау басталғанын хабарлады, деп хабарлайды DKNews.kz.
Биыл бағдарлама жаңартылған форматта alem.ai халықаралық жасанды интеллект орталығының базасында өтеді.
Өтінім қабылдау 2026 жылғы 27 наурызға дейін astanahub.com платформасында жүргізіледі.
Бағдарламаға әлемнің әр елінен мамандар қатыса алады
AI’preneurs бағдарламасы әртүрлі елдерден келген мамандарды бір ортаға біріктіреді.
Қатысушылар идеяны қалыптастыру, команда құру, MVP әзірлеу, алғашқы пилоттық жобаларды іске асыру және инвестиция тарту сияқты стартапты дамыту кезеңдерінен өтеді.
Бағдарламаға әзірлеушілер, инженерлер, жасанды интеллект мамандары, өнім менеджерлері, кәсіпкерлер және стартап бастауға ниетті басқа да мамандар қатыса алады.
Іріктеу кезінде қатысушылардың өнім жасау қабілетіне, гипотезаларды жылдам тексеріп және нақты нәтиже көрсете алуына ерекше мән беріледі.
Бұған дейін 35 AI-стартап құрылған
Astana Hub басқарушы директоры Таңат Өскембаевтың айтуынша, бағдарлама өңірде жасанды интеллект кәсіпкерлерінің жаңа қауымдастығын қалыптастыруға ықпал етіп келеді.
«AI’preneurs бағдарламасының алдыңғы лектеріне 960-тан астам өтінім түсті. Нәтижесінде 79 қатысушы бағдарламаны аяқтап, 35 стартап құрылды. Олар бүгінде 400 мың доллардан астам инвестиция тартты. Бұл көрсеткіштер өңірде AI-кәсіпкерлер қауымдастығының қалыптасып келе жатқанын аңғартады. Біздің мақсатымыз – әртүрлі саладағы талантты мамандарды біріктіріп, сол ортада жаңа идеялардың пайда болуына және жаһандық деңгейдегі AI-стартаптар құра алатын мықты командалардың қалыптасуына жағдай жасау», – деді Таңат Өскембаев.
Бағдарлама екі кезеңнен тұрады
AI’preneurs бағдарламасы екі негізгі кезеңнен тұрады.
Алғашқы кезең – Founder Lab, ол төрт аптаға созылады, осы уақытта қатысушылар кәсіпкерлік дағдыларын дамытып және түрлі челлендждер мен хакатондарға қатысып, тәжірибелі фаундерлермен кездесіп және болашақ жобаларға арналған командалар құрады.
Екінші кезең – Core Accelerator, ол он аптаға созылады, бұл уақытта командалар гипотезаларды тексеріп, MVP әзірлейді және алғашқы клиенттермен жұмыс істей бастайды.
Бағдарламаның қорытынды кезеңі Demo Day форматында өтеді, онда қатысушылар өз жобаларын инвесторлар мен корпоративтік серіктестерге таныстырады.
Қатысушыларға халықаралық мүмкіндіктер ұсынылады
Бағдарлама аясында қатысушылар Astana Hub инфрақұрылымына және AlemPlus технологиялық платформасына қол жеткізеді.
Сонымен қатар менторлық қолдау, воркшоптар және стартаптарды дамытуға арналған трекинг бағдарламалары ұсынылады.
Ұйымдастырушылардың айтуынша, бағдарлама алғашқы инвестиция тартуға және Astana Hub жаһандық желісі арқылы халықаралық нарықтарға шығуға мүмкіндік береді.
