Қазақстан Республикасы Мемлекеттік қызмет істері агенттігінің Батыс Қазақстан облысы бойынша департаменті мемлекеттік қызмет көрсету сапасын арттыру және қызмет алушылардың бұзылған құқықтарын қалпына келтіру бағытында жүйелі жұмыс жүргізіп келеді, деп хабарлайды DKNews.kz.
Арыз-шағымдар мен цифрлық мониторинг тұрақты жүргізіледі
Азаматтардың заңды құқықтарының сақталуын қамтамасыз ету мақсатында Департамент келіп түскен арыз-шағымдарды жан-жақты қарап, мемлекеттік органдардың ақпараттық жүйелері арқылы көрсетілетін қызметтерге тұрақты түрде қашықтықтан мониторинг жүргізеді.
Ағымдағы жылдың өткен кезеңінде:
- қашықтықтан мониторинг нәтижесінде 132 қызмет алушының
- шағымдарды қарау нәтижесінде 14 қызмет алушының
бұзылған құқықтары қалпына келтірілді.
Жер учаскесіне қатысты өтінім қайта қаралды
Талдау барысында бірқатар заңбұзушылықтар анықталды.
Мысалы, ауылдық округ әкімінің аппараты өзіндік қосалқы шаруашылығын жүргізу үшін жер учаскесіне құқық алу жөніндегі өтінімді жер комиссиясында қарамай, негізсіз бас тартқан.
Департаменттің ұсынымынан кейін өтінім жер комиссиясында қайта қаралып, тиісті шешім қабылданды.
Медициналық ұйымдарға тіркеуден бас тарту деректері анықталды
Сондай-ақ медициналық ұйымдар тарапынан азаматтарды медициналық-санитариялық алғашқы көмек көрсететін ұйымдарға тіркеуден негізсіз бас тарту жағдайлары тіркелген.
Нәтижесінде департаменттің араласуынан кейін азаматтар қажетті медициналық ұйымдарға тіркелді.
Қару сақтауға рұқсат беру қызметінде кемшіліктер анықталды
Бұдан бөлек «Е-лицензиялау» ақпараттық жүйесі арқылы «Жеке тұлғаларға азаматтық қару мен оның патрондарын сақтауға және алып жүруге рұқсат беру» мемлекеттік қызметі бойынша өтінімдердің тіркелмегені анықталған.
Департаменттің ұсынымынан кейін өтінімдер тіркеліп, азаматтардың құқықтары қалпына келтірілді.
Департамент жұмысы жалғасады
Мекеме өкілдерінің айтуынша, алдағы уақытта да мемлекеттік қызмет көрсету саласында заңдылықтың сақталуын қамтамасыз ету, қызмет сапасын арттыру және азаматтардың құқықтарын қорғау бағытындағы жұмыстар жүйелі түрде жалғаса береді.
