Шымкентте жаңа Конституция жобасы бойынша өткен республикалық референдумда әскери қызметшілер белсенділік танытты. Қаланың 35748 әскери бөлімінің сарбаздары №131 референдум учаскесіне сап түзеп келіп, дауыс беруге қатысты, деп хабарлайды DKNews.kz.
Жергілікті тұрғындар үшін бұл көрініс ерекше әсер қалдырды. Әскерилердің тәртіппен келуі мен азаматтық белсенділігі көпшілік назарын аударды.
Мемлекеттік Әнұранмен басталған дауыс беру
Учаскенің ресми ашылуында дәстүрге сай Қазақстан Республикасының Мемлекеттік Әнұраны шырқалды. Сарбаздар әнұранды бір кісідей орындап, салтанатты сәтке ерекше рух берді.
Бұл көрініс жиналған тұрғындардың патриоттық көңіл-күйін көтеріп, маңызды саяси шараның мәнін айқындай түсті.
Алғаш рет дауыс берген сарбаз
Референдумда алғашқылардың бірі болып дауыс бергендердің қатарында қатардағы жауынгер Али Иманбек болды.
Ол бұл оның өміріндегі алғашқы саяси науқан екенін айтты.
«Мен үшін бұл үлкен жауапкершілік. Еліміздің болашағына әсер ететін осындай маңызды шараға қатысып, азаматтық борышымызды орындау – әрбіріміздің міндетіміз», — деді сарбаз.
Ардагерлер де белсенділік танытты
Бұл күні Қарулы күштердің ардагерлері де референдумға қатысып, өз азаматтық ұстанымдарын білдірді.
Солардың бірі – запастағы полковник Реимбай Халмуратов.
«Конституция – еліміздің негізгі заңы. Сондықтан бүгінгі референдум ел дамуы үшін маңызды қадам деп санаймын. Мен өз таңдауымды жасадым», — деді ол.
Ұлттық дәстүрмен қарсы алу
№131 учаскесінде сайлаушыларды учаскелік референдум комиссиясының мүшелері ұлттық нақыштағы киімдермен қарсы алды.
Ұйымдастырушылардың айтуынша, Наурызнама онкүндігімен тұспа-тұс келген маңызды саяси шараны ұлттық дәстүрмен өткізу – патриотизмнің көрінісі.
Мұндай бастамалар референдум атмосферасын ерекше мәнге бөлеп, азаматтардың белсенді қатысуына оң әсер етті.
