Қазақстанда өткен республикалық референдумды халықаралық бақылаушылар жоғары деңгейде ұйымдастырылған саяси оқиға ретінде бағалады. Бұл туралы Тәжікстан Республикасының Орталық сайлау және референдум комиссиясының төрағасы Бахтиёр Худоёрзода баспасөз конференциясында мәлімдеді, деп хабарлайды DKNews.kz.
Оның айтуынша, халықаралық бақылаушылар Қазақстан тарапына референдумды дайындау және өткізу процесін бақылауға мүмкіндік бергені үшін алғыс білдірген.
Фотосурет: election.gov.kz
«Халықаралық бақылаушылар Қазақстан тарапына жаңа Конституцияны қабылдау бойынша республикалық референдумды дайындау және өткізу процесін бақылауға қатысуға шақырғаны үшін алғыс білдіреді. Осы бақылаушылардың пікірін қолдай отырып, біз Қазақстан Республикасының Орталық комиссиясының референдумды өткізу бойынша кең ауқымды ұйымдастырушылық жұмысын ерекше атап өткім келеді», – деді Худоёрзода.
Дайындық барлық деңгейде жүргізілген
Халықаралық бақылаушының айтуынша, референдумға дайындық барлық деңгейдегі комиссиялардың үйлесімді жұмысы арқылы жүргізілген.
«Біздің бақылауымыз көрсеткендей, референдумды дайындау және өткізу бойынша барлық деңгейдегі комиссиялар, оның ішінде Қазақстан Республикасының Орталық комиссиясы, азаматтардың республикалық референдумға қатысуына толық жағдай жасау үшін ауқымды жұмыстарды жүргізді. Бұл жұмыс жоспарлы және білікті түрде, республикалық референдум өткізудің негізгі принциптеріне сай жүзеге асырылды», – деді ол.
Дауыс беру заң талаптарына сай өтті
Бақылаушылардың пікірінше, референдумды ұйымдастыру Қазақстанның Конституциясы мен қолданыстағы заңнамасына толық сәйкес жүргізілген.
«Қазақстан Республикасының Конституциясына және республикалық референдум туралы Конституциялық заңына сәйкес, Қазақстан Республикасының Орталық комиссиясы өзіне жүктелген өкілеттілікті орындап, азаматтардың ерікті түрде дауыс беруге қатысуын және дауыс беру процесінің айқын болуын қамтамасыз етті», – деді халықаралық бақылаушы.
Бақылаушылар учаскелерді аралады
15 наурыз күні халықаралық бақылаушылар Астана қаласындағы бірнеше референдум учаскесінде болып, дауыс беру процесін бақылаған.
«15 наурызда біз Астана қаласындағы бірнеше учаскеде болып, дауыс беру процесін бақыладық. Учаскелік комиссиялардың референдумды өткізу жұмысы референдумға ерікті қатысу және ашықтық принциптеріне сай болды», – деді Худоёрзода.
Оның сөзінше, Қазақстан азаматтары өздерінің конституциялық құқықтарын еркін пайдаланып, дауыс беру арқылы ел болашағына қатысты шешім қабылдауға қатысқан.
Маңызды саяси оқиға
Сарапшылардың айтуынша, республикалық референдум – елдің саяси жүйесі мен құқықтық негізін айқындайтын маңызды демократиялық құрал.
Халықаралық бақылаушылардың пікірлері референдумның ашық әрі ұйымдасқан түрде өткенін көрсетіп, Қазақстандағы демократиялық процестердің дамуына берілген бағалардың бірі ретінде қарастырылады.
