Digital Qazaqstan халықаралық форумы аясында Digital Qazaqstan стратегиясының жобасына арналған дөңгелек үстел өтті. Талқылауға Мәжіліс депутаттары, негізгі мемлекеттік органдардың вице-министрлері, салалық сарапшылар және IT-қоғамдастық өкілдері қатысты, деп хабарлайды DKNews.kz.
Мемлекет басшысының Жолдауы мен тапсырмалары
«Жасанды интеллект дәуіріндегі Қазақстан: өзекті міндеттер және оларды цифрлық трансформация арқылы шешу» атты Жолдауында Мемлекет басшысы Қасым-Жомарт Тоқаев цифрландыру мен жасанды интеллектті дамыту бойынша бірыңғай тұжырымдамалық құжат әзірлеуді тапсырды.
2026 жылғы 13 наурызда Мемлекет басшысының төрағалығымен жұмыс кеңесі өтті. Президент цифрландыру мен жасанды интеллект жылы аясында озық технологиялар мен ЖИ-ді ел өмірінің барлық салаларына кеңінен енгізу басымдық екенін атап өтті. Сонымен қатар, стратегия азаматтар мен бизнестің нақты қажеттіліктеріне негізделуі тиіс екенін жеткізді.
Стратегияның архитектурасы
Дөңгелек үстел барысында стратегияның негізгі бағыттары таныстырылды:
- «Мемлекет платформа ретінде» моделіне көшу;
- Деректер экономикасын дамыту;
- Жасанды интеллектті жүйелі түрде енгізу.
Цифрлық үкіметті қолдау орталығының бас директоры Алия Оспанова атап өткендей:
«Бүгінде цифрландыру - бұл жекелеген сервистер туралы ғана емес, мемлекетті жүйелі түрде қайта құру туралы. Біз деректер шешім қабылдаудың негізіне айналатын, ал архитектура өзгерістерді басқарудың негізгі құралы болатын модельге көшудеміз. Digital Qazaqstan стратегиясы бірыңғай цифрлық кеңістікті қалыптастырады, онда мемлекеттік қызметтерден бастап салалық шешімдерге дейінгі барлық процестер бір жүйенің өзара байланысқан элементтері ретінде құрылады».
Алынған нәтижелер
Ұсынылған материалдарға сәйкес, Қазақстанда цифрлық трансформация аясында маңызды нәтижелерге қол жеткізілді:
- Деректерді басқарудың бірыңғай жүйесі құрылды;
- Миллиондаған проактивті қызметтер көрсетілуде;
- Әлеуметтік әмиян іске қосылды;
- Цифрлық нотариат дамып келеді;
- Өнеркәсіпте цифрлық егіздер енгізілуде;
- 89 қала цифрландырылды.
Жасанды интеллектті енгізу мемлекеттік функциялар мен салалардың тиімділігін арттырудың негізгі құралы ретінде қарастырылуда.
Қорытынды
Талқылау қорытындысы бойынша қатысушылар Digital Qazaqstan стратегиясы data-driven және AI-first қағидаттарына негізделген жаңа даму моделіне көшуге жол ашатынын атап өтті. Бұл модельде деректер мен технологияларды азаматтар мен бизнестің мүддесі үшін тиімді пайдалану негізгі фактор болып табылады.
