2026 жылы Қазақстанда елдің негізгі туристік аймақтарына көлік қолжетімділігін арттыру бағытындағы ауқымды жұмыстар жалғасуда. Бұл шаралар тек жол жүрісін жылдамдатумен шектелмей, жол бойындағы инфрақұрылым сапасын арттыру арқылы ішкі туризмді дамытуға серпін береді, деп хабарлайды DKNews.kz.
Республикалық маңызы бар жобалар
Туризмді қолдау мақсатындағы басты жобалардың ішінде:
- «Бейнеу – Сексеуіл» бағыты – болашақта Каспий теңізіне апаратын жолды ашады
- «Орталық – Батыс» дәлізі – Торғай өңіріндегі туристік аймақтарды елордамен байланыстырады
- «Өскемен – Рахман қайнары» жобасы – Шығыс Қазақстанның туризмін дамытады
Сонымен қатар, республикалық маңызы бар жолдардың орташа жөндеуі аясында келесі учаскелер жаңартылады:
- Жаңаөзен – Кендірлі
- Өскемен – Қатонқарағай
- Көкшетау – Зеренді
- Кеген – Қырғызстан шекарасы
- Қалқаман – Баянауыл
Өңірлік жобалар мен сервистік инфрақұрылым
Жергілікті атқарушы органдар туристік аймақтарға қолайлы қатынауды қамтамасыз етуге бағытталған 33 өңірлік жобаны іске асыруда. Сонымен қатар, «ҚазАвтоЖол» ҰК» АҚ облыс әкімдіктерімен бірлесіп, жол бойындағы сервисті дамыту жұмыстарын жүргізуде. 2026 жылы жол бойына 50 жаңа сервистік нысан салу жоспарлануда.
Кәсіпкерлерді қолдау үшін жаңа нысандардың күтімі мен шығындарын өтеу тетігі де қарастырылған.
Алакөл көлінің айналма жолы
Алакөл көлінің жағалауына қолжетімділікті жақсарту мақсатында 8,2 км ұзындығындағы «Қабанбай ауылының айналма жолы» жобасы әзірленді. Бұл жол транзиттік жүктемені азайтып, туристер үшін ыңғайлы қатынасты қамтамасыз етеді.
Күтілетін нәтиже
Барлық шаралардың іске асырылуы:
- автожол желісінің өткізу қабілетін арттырады
- инфрақұрылым сапасын жақсартады
- туристік объектілерге жету уақытын қысқартады
- ішкі туризмді дамыту мен жол саласындағы кәсіпкерлерді қолдауға мүмкіндік береді
Бұл жобалар Қазақстанда туризм мен инфрақұрылымды дамытудың жаңа серпіні болып отыр.
