Төтенше жағдайлар министрлігінде ведомство қызметкерлеріне пәтер кілттерін табыстау рәсімі өтті. Іс-шара Отан қорғаушылар күні мен Жеңіс күніне орай ұйымдастырылды, деп хабарлайды DKNews.kz.
Рәсім барысында Төтенше жағдайлар министрі, генерал-лейтенант Шыңғыс Әрінов құтқарушыларға жаңа баспана кілттерін табыс етті.
Мемлекет тарапынан қолдау жалғасып келеді
Салтанатты жиында министр құтқарушылардың еңбегі мемлекет тарапынан жоғары бағаланатынын атап өтті.
«Мемлекет басшысының атынан азаматтарымыздың қауіпсіздігі жолындағы кәсібиліктеріңіз, ерліктеріңіз бен күнделікті еңбектеріңіз үшін ризашылық және құрмет белгісі ретінде сіздер пәтер кілттерін алып жатырсыздар. Мемлекет азаматтық қорғау жүйесінің әрбір қызметкерінің үлесін жоғары бағалайды, құтқарушылар мен олардың отбасыларын қолдау жұмыстарын жалғастырады. Құтқарушылар алдағы уақытта да өз міндеттерін абыроймен атқара беретініне сенімдімін», – деді Шыңғыс Әрінов.
Бірнеше құрылым қызметкерлері баспанамен қамтылды
Пәтер кілттері түрлі ведомстволардың қызметкерлеріне берілді:
- Өнеркәсіптік қауіпсіздік және мемлекеттік материалдық резервтер комитеттерінің мамандары;
- ТЖМ Апаттар медицинасы орталығының қызметкерлері;
- ТЖМ «Қазавиақұтқару» өкілдері;
- Астана қаласы Төтенше жағдайлар департаментінің қызметкерлері.
Қызметкерлер еңбегіне көрсетілген құрмет белгісі
Бұл бастама төтенше жағдайлардың алдын алу және оларды жою жүйесінде еңбек етіп жүрген мамандарға көрсетілген әлеуметтік қолдаудың бір бөлігі болды.
Мамандардың айтуынша, мұндай қадамдар құтқарушылардың кәсіби мотивациясын арттырып, азаматтардың қауіпсіздігін қамтамасыз ету жүйесін нығайта түседі.
