Ташкент қаласында өткен «UEW 2026» халықаралық энергетикалық форумы аясында Қазақстан, Өзбекстан және Әзербайжан энергетика ведомстволары өкілдерінің үшжақты кездесуі өтті. Қазақстан тарапынан жиынға Қазақстан Республикасы Энергетика вице-министрі Бақытжан Ілияс қатысты, деп хабарлайды DKNews.kz.
Кездесуде «Green Corridor Alliance» жобасын іске асырудың қазіргі барысы және өңірлік энергетикалық ынтымақтастықты кеңейту мәселелері қаралды.
«Green Corridor Alliance» жобасы — негізгі күн тәртібінде
Тараптар Қазақстан, Әзербайжан және Өзбекстан арасындағы «жасыл» энергияны өндіру және жеткізу тізбегін дамытуға бағытталған жобаның жүзеге асу кезеңін талқылады.
Жоба аясында:
- жаңартылатын энергия көздерінің әлеуетін тиімді пайдалану;
- мемлекетаралық энергетикалық байланыстарды дамыту;
- «жасыл» электр энергиясын Еуропа және басқа өңірлерге экспорттау мүмкіндігін кеңейту көзделген.
COP29 келісімі энергетикалық ынтымақтастыққа негіз болды
Кездесу барысында Бақытжан Ілияс Бакуде өткен COP29 конференциясы аясында үш елдің мемлекет басшылары қол қойған келісімнің маңызына тоқталды.
Оның айтуынша, бұл құжат:
- тұрақты энергетикалық дәліз қалыптастыруға;
- экологиялық таза электр энергиясы саудасын кеңейтуге;
- өңірлік энергетикалық интеграцияны нығайтуға негіз болады.
Инфрақұрылымды дамытуға ерекше назар
Кездесуде Орталық Азия мен Оңтүстік Кавказ елдерінің энергетикалық жүйелерін біріктіру үшін:
- қолданыстағы инфрақұрылымды кеңейту;
- жаңа электр беру желілерін салу мәселелері қаралды.
Бұл қадамдар энергожүйелердің тұрақты әрі тиімді өзара байланысын қамтамасыз етуге бағытталған.
Қазақстан ратификация туралы заңды бекітті
Қазақстан тарапы 2026 жылғы 27 сәуірде Президенттің аталған келісімді ратификациялау туралы заңға қол қойғанын атап өтті.
Бұл шешім Қазақстанның өңірдегі тұрақты әрі өзара байланысты энергетикалық инфрақұрылымды дамытуға бейілдігін растайды.
Жобаны одан әрі ілгерілету жоспарланған
Кездесу қорытындысында қатысушылар жобаны әрі қарай дамытуға және трансөңірлік «жасыл» энергетикалық дәліз бойынша бірлескен жұмысты жалғастыруға дайын екенін растады.
