Мемлекет басшысының жылу-энергетикалық инфрақұрылымды жаңғырту жөніндегі тапсырмаларын орындау аясында Қазақстан Республикасы Үкіметінің резервінен Ақмола облысындағы Степногорск пен Көкшетау қалаларына 3,9 млрд теңгеден астам қаражат бөлінді, деп хабарлайды DKNews.kz.
Тиісті қаулыға Премьер-министр Олжас Бектенов қол қойған.
Қаражат қай бағыттарға жұмсалады?
Бөлінген қаржы инженерлік желілер мен жылу көздерінің тозуын азайтуға бағытталады.
Қаражаттың:
- шамамен 2,7 млрд теңгесі Степногорск қаласындағы 7,5 шақырым магистральдық жылу желісін жөндеу жобасын аяқтауға
- 1,2 млрд теңгесі Көкшетаудағы №1 және №2 қазандықтарының энергетикалық қазандықтарын, жабдықтары мен жүйелерін қалпына келтіруге
жұмсалмақ.
Көкшетауда тозу деңгейі төмендеген
Қазіргі таңда Көкшетау қаласын екі қазандық жылумен қамтамасыз етіп отыр. Негізгі жылу көзі — АҚ-2 қазандығы.
Өткен жылы Үкімет резервінен бөлінген қаражат есебінен қалада кешенді техникалық жұмыстар жүргізілген.
Нәтижесінде:
- жабдықтардың тозу деңгейі 44%-дан 42%-ға дейін төмендеген
Степногорскіде жылу желілері жаңартылды
Степногорск қаласында да Үкімет резерві есебінен ауқымды жұмыстар атқарылған.
Атап айтқанда:
- 7,1 шақырым магистральдық жылу желісі жаңартылды
Соның нәтижесінде:
- желілердің тозу деңгейі 71,4%-дан 68%-ға дейін азайды
Бұл тұрғындарға не береді?
Үкімет мәліметінше, аталған жобаларды жүзеге асыру:
- тұрғындарды тұрақты жылумен қамтамасыз етуге
- желілердегі апат санын азайтуға
- алдағы жылыту маусымдарын қалыпты өткізуге
мүмкіндік береді.
Қазақстан бойынша қандай жұмыстар жүргізілді?
Жалпы еліміз бойынша қабылданған шаралардың нәтижесінде 2025 жылы:
- 10 энергоблокқа
- 63 қазандыққа
- 39 турбинаға
күрделі жөндеу жүргізілді.
Сонымен қатар:
- 323 шақырым жылу желісі жаңартылды
- 17 мың шақырым электр тарату желісі жөнделді
- 420 қосалқы станса қалпына келтірілді
Энергетикалық жүйедегі жағдай жақсарып келеді
Үкіметтің мәліметінше, жүргізілген жұмыстар нәтижесінде:
- электр стансаларындағы жабдықтардың тозу деңгейі 53%-ға дейін төмендеді
- жылу желілерінің тозуы 50%-ға дейін азайды
- технологиялық бұзушылықтар саны 15%-ға қысқарды
Сонымен қатар 8 жылу электр орталығы тәуекел аймақтарынан шығарылған.
Оның ішінде:
- бесеуі «қызыл» аймақтан «сарыға»
- үшеуі «сарыдан» «жасыл» аймаққа
ауыстырылды.
Қазір жекелеген жаңғырту жоспарлары бекітіліп, жөндеу жұмыстарына бөлінетін қаржы көлемі ұлғайтылып жатыр.
