Қазақстанда оқу жылы аяқталуға жақын. Миллиондаған оқушы жазғы демалысқа шықса, ата-аналар үшін басты сұрақ — баланың қауіпсіздігі мен бос уақытын тиімді өткізуі, деп хабарлайды DKNews.kz.
Үкіметте өткен жиында Премьер-министр Олжас Бектенов дәл осы мәселеге ерекше тоқталды. Оның айтуынша, жаз мезгілі балалар үшін тек тынығу уақыты емес, мемлекет үшін жауапты кезең.
Биыл ел бойынша 3,1 миллион баланы жазғы демалыс бағдарламаларымен қамту жоспарланып отыр. Бұл — жай статистика емес. Оның ішінде мыңдаған лагерь, маусымдық орталықтар, мектеп жанындағы алаңдар және балаларға арналған түрлі сауықтыру бағдарламалары бар. Үкімет бұл жолы тек демалысты ұйымдастырумен шектелмей, қауіпсіздік, тәрбие және қоғамдық мәдениет мәселесін қатар көтерді.
Премьер-министрдің сөзінше, әрбір лагерь санитарлық талаптарға, өрт қауіпсіздігіне және терроризмге қарсы нормаларға толық сай болуы керек. Әсіресе балалар жаппай баратын орындарда бақылау күшейтіледі. Денсаулық сақтау, Оқу-ағарту министрліктері мен әкімдіктерге осы аптаның соңына дейін барлық демалыс орындарының дайындығын толық аяқтау тапсырылды.
Лагерь ғана емес, тәрбие алаңы
Үкімет биылғы жазғы бағдарламаларға идеологиялық әрі тәрбиелік бағытты да күшейтпек. Мемлекет басшысы бастамашылық еткен «Адал азамат» бағдарламасы аясында балаларға азаматтық жауапкершілік, еңбекқорлық, мәдениет және тәртіп құндылықтарын дәріптеу көзделіп отыр.
Яғни лагерьдегі жазғы уақыт енді тек ойын-сауықпен шектелмейді. Балаларға кітап оқу мәдениеті, тарихты білу, қоғамға құрмет, экологияға жауапкершілік секілді құндылықтар үйретілмек.
Бұл бағытта «Таза Қазақстан» бастамасы да негізгі құралдардың біріне айналады. Жазғы демалыс кезінде оқушылар экологиялық акцияларға, волонтерлік жобаларға, аумақтарды абаттандыру жұмыстарына қатысады. Үкімет осылайша жасөспірімдердің бос уақытын пайдалы әрі мазмұнды етуге тырысып отыр.
Үкіметті алаңдатқан мәселе — жасөспірімдер арасындағы тәртіп
Жиында ерекше назар аударылған тақырыптардың бірі — кәмелетке толмағандар арасындағы құқық бұзушылық пен вандализм.
Соңғы уақытта қоғамдық орындардағы тәртіпсіздік, жастар арасындағы агрессия және мәдениетсіз мінез-құлық мәселесі қоғамда жиі талқыланып жүр. Үкімет мұны жазғы кезеңде бақылаусыз қалдыруға болмайтынын ашық айтты.
Сондықтан әкімдіктер мен полицияға жастар көп жиналатын орындарды патрульдеу тапсырылды. Балалар лагерлерінде эвакуациялық оқу-жаттығулар өткізіліп, тәрбиешілер мен нұсқаушыларға арнайы қауіпсіздік түсіндірулері жүргізіледі.
Бұдан бөлек, балаларды тасымалдау мәселесі де қатаң бақылауға алынбақ. Әсіресе жазғы экскурсиялар мен лагерьлерге баратын автобустардың қауіпсіздігі тексеріледі.
Музей, театр және ұлттық парк — тегін
Үкімет балалардың жазғы уақытын тек лагерьмен шектемек емес. Мәдениет және ақпарат министрлігіне балалардың музейлерге, театрларға, кітапханаларға және ұлттық парктерге тегін бару бағдарламасын кеңейту тапсырылды.
Ал Туризм және спорт министрлігі ішкі балалар туризмін қолжетімді етуі тиіс. Бұл әсіресе ауылдық жерлердегі балалар үшін маңызды мәселе болып отыр.
Сонымен қатар оқушылар мен студенттердің жазғы уақытша жұмыспен қамтылуына да назар аударылмақ. Еңбек министрлігі әкімдіктермен бірге жастарды қауіпсіз әрі заңды түрде маусымдық жұмыстарға тарту жолдарын қарастырады.
Үкіметтің негізгі ойы — баланы мемлекет емес, ең алдымен отбасы тәрбиелейді
Жиын соңында Олжас Бектенов ата-ананың рөліне арнайы тоқталды. Оның айтуынша, баланың қандай ортада жүретініне, кіммен араласатынына және бос уақытын қалай өткізетініне ең алдымен отбасы жауапты.
Премьер-министрдің сөзінше, ата-ананың мейірімі мен тәрбиесін көріп өскен бала адалдық, еңбекқорлық және азаматтық жауапкершілік сияқты қасиеттерді бойына ерте сіңіреді.
Үкіметтің қазіргі ұстанымы да осыған саяды: қауіпсіз лагерь салу жеткіліксіз, ең маңыздысы — саналы ұрпақ тәрбиелеу.
