Қазақстанда жазғы демалыс маусымы басталар алдында полиция балалар қауіпсіздігіне қатысты бақылауды күшейтеді.
Маусым айында елдің барлық өңірінде «Автобус» жедел-профилактикалық іс-шарасы өтеді, деп хабарлайды DKNews.kz.
Оның аясында балаларды тасымалдайтын көліктердің техникалық жағдайы тексеріліп, жүргізушілерге бақылау күшейтіледі. Сонымен қатар балалар лагерьлерінің қызметкерлері де арнайы тексерістен өтеді.
Бұл туралы Үкімет отырысында Ішкі істер министрі Ержан Сәденов мәлімдеді.
Жазғы каникул басталғанда ата-аналарды алаңдататын негізгі сұрақтардың бірі – балалардың қауіпсіздігі. Биыл ІІМ бұл мәселеге ерекше назар аударып отыр. Министрдің айтуынша, мектептерге полиция қызметкерлері бекітілген. Олар оқушылармен құқықтық тәрбие, жеке қауіпсіздік және заң талаптарын сақтау бойынша арнайы сабақтар өткізген.
«Балалардың қауіпсіздігі – ІІМ-нің ерекше бақылауында. Мектептерге полиция қызметкерлері бекітілген. Олар қауіпсіздік туралы және құқықтық тәрбие бойынша сабақтар өткізеді, профилактикалық жұмыстар жүргізеді, құқық бұзушылықтарға тосқауыл қояды», — деді ішкі істер министрі Ержан Сәденов.
Министрдің сөзінше, «Соңғы қоңырау» іс-шаралары кезінде қауіпсіздік толық қамтамасыз етілген. Сонымен қатар білім беру нысандарының терроризмге қарсы қорғалу деңгейі тексеріліп жатыр.
«Абайлаңыз – балалар!» рейдінен кейін жаңа бақылау басталады
18–25 мамыр аралығында ел бойынша «Абайлаңыз – балалар!» атты жедел-профилактикалық іс-шара өткен. Ал енді маусым айында полиция жолдағы бақылауды тағы да күшейтпек.
Әсіресе балаларды лагерлерге, экскурсияларға немесе демалыс орындарына тасымалдайтын автобустар жіті тексеріледі. Полицейлер көліктің техникалық жағдайына, жүргізушілердің тәртібіне және қауіпсіздік талаптарының сақталуына назар аударады.
Себебі жаз мезгілінде балалар қатысатын жол-көлік оқиғалары көбейетіні жыл сайын байқалады. Сондықтан биыл ІІМ алдын алу шараларын ерте бастап отыр.
Балалар лагерьлеріне жаңа талап енгізілді
Биылдан бастап балалар лагерьлері ресми түрде қосымша білім беру ұйымдарының қатарына енгізіледі. Бұл олардың қауіпсіздік талаптары бойынша бақылауын күшейтеді.
«Енді балалар лагерьлері – қосымша білім беру объектілеріне жатқызылады. Әкімдіктер оларды қысқа мерзімде өңірлік тізбесіне енгізу қажет. Өз кезегінде, ІІМ лагерь қызметшілерін тексеру, полиция қызметкерлерін бекіту, ұйымдастырылған балалар тасымалдауын сүйемелдеуді қамтамасыз етеді», — деді министр.
Яғни лагерьде жұмыс істейтін қызметкерлердің деректері тексеріліп, балалармен жұмыс істеуге қатысты қауіпсіздік сүзгілері күшейтіледі.
Түнгі рейдтер де жалғасады
Жазғы демалыс кезінде полиция «Түнгі қаладағы балалар» атты арнайы рейд ұйымдастырады. Негізгі мақсат – жасөспірімдер арасындағы құқық бұзушылықтың алдын алу.
Полицейлер түнде көшеде жүрген кәмелетке толмағандарды анықтап, әлеуметтік жағдайы төмен және есепте тұрған отбасылармен жұмыс жүргізеді. Сонымен қатар балаларға алкоголь мен темекі сатуға бақылау күшейтіледі.
ІІМ мәліметінше, «қиын» жасөспірімдерді спортқа, қоғамдық жұмыстарға және пайдалы іс-шараларға тарту жалғасып жатыр.
Мектеп маңындағы қауіпсіздік те тексерілуде
Жаңа оқу жылына дайындық та қазірден басталған. Полиция мектептердің айналасындағы қауіпсіздік инфрақұрылымын тексеріп жатыр. Тексеру барысында бірқатар кемшілік анықталған.
ІІМ әкімдіктерге оқу жылы басталғанға дейін жол белгілері, жаяу жүргінші өткелдері мен қауіпсіздік жүйелерін ретке келтіруді тапсырды.
Жазғы демалыс балалар үшін қызыққа толы кезең болғанымен, дәл осы уақытта қауіп те көбейеді. Сондықтан биыл полиция тек бақылауды күшейтіп қана қоймай, алдын алу жұмыстарын да жаңа деңгейге шығармақ.
