Қазақстанда әділдік тақырыбы қоғамдағы ең өзекті мәселелердің біріне айналып келеді, деп хабарлайды DKNews.kz.
Соңғы жылдары азаматтардың ашықтыққа, жауапкершілікке және тиімді мемлекеттік институттарға деген сұранысы артты. Осы үрдіс аясында «Әділет» партиясы ұйымдық құрылымын күшейтіп, өңірлердегі жұмысын жаңа деңгейге көтеруді көздеп отыр.
Бұл туралы партияның Саяси кеңесінің отырысында айтылды.
Әділдікке сұраныс артып келеді
Партия төрағасы Айбек Дәдебайдың айтуынша, «Әділет» партиясының құрылуы қоғамның әділдікке деген сұранысының және азаматтардың қолдауының нәтижесі.
Бүгінде партия қатарына еңбек адамдары, түрлі кәсіби қауымдастық өкілдері, жастар мен қоғам белсенділері қосылып жатыр.
Оның пікірінше, бұл қоғамдағы өзгерістерге деген сұраныстың күшейгенін көрсетеді.
«Бүгінде әділдік идеясын қоғам барған сайын кеңінен қолдап келе жатқанын көріп отырмыз. Партия төңірегіне еңбек адамдары, кәсіби қауымдастық өкілдері, жастар мен қоғам қайраткерлері бас қосып жатыр. Алдымызда өңірлерде тиімді ұйымдар құру, партиялық басқарудың заманауи жүйесін қалыптастыру, партияның мықты сараптамалық және кадрлық әлеуетін жасақтау міндеті тұр. Ең бастысы — азаматтардың сенімін ақтауымыз керек», – деді Айбек Дәдебай.
Өңірлерге ерекше назар аударылады
Отырыста алдағы кезеңдегі негізгі басымдықтар талқыланды.
Партия басшылығының пікірінше, азаматтардың мәселелерін тиімді шешу үшін өңірлік құрылымдардың жұмысын күшейту маңызды.
Сондықтан алдағы уақытта жергілікті ұйымдардың әлеуетін арттыруға, жаңа кадрларды тартуға және партиялық басқарудың заманауи тетіктерін енгізуге басымдық беріледі.
ІІ съезге дайындық басталды
Саяси кеңес мүшелері 14 маусымда Астанада өтетін партияның ІІ съезіне дайындық мәселелерін де қарады.
Жиында ұйымдық құрылымды дамыту, өңірлердегі жұмысты жетілдіру және партияның сараптамалық әлеуетін күшейтуге қатысты ұсыныстар талқыланды.
Қоғамды біріктіретін құндылықтар
Талқылау барысында қатысушылар әділдік, жауапкершілік және елдің жасампаз дамуы идеялары төңірегінде күш біріктірудің маңызын атап өтті.
«Ұлттық рух» қоғамдық бірлестігінің төрағасы Аят Сүгірбай өңірлік жұмысты күшейтудің өзектілігіне тоқталса, саясаттанушы Бүріхан Нұрмұхамедов қоғамдағы оң өзгерістер үшін ортақ жауапкершіліктің маңызына назар аударды.
Алда қандай бастамалар бар?
Қазіргі уақытта «Әділет» партиясы қоғамдық және кәсіби ұйымдармен ынтымақтастықты кеңейтіп жатыр.
Сондай-ақ Әділетті Қазақстанды дамытуға бағытталған өзекті мәселелер бойынша жаңа бастамалар әзірленуде.
Партия өкілдерінің айтуынша, негізгі мақсат — азаматтардың сенімін ақтайтын нақты ұсыныстар мен нәтижелі жұмыстарды жүзеге асыру.
