Премьер-министр Олжас Бектеновтің төрағалығымен өткен Үкімет отырысында туристік саланы дамыту және жазғы туристік маусымға дайындық мәселелері талқыланды. Жиында бірқатар министрлер мен өңір әкімдері баяндама жасап, туристік инфрақұрылым, қауіпсіздік және инвестициялық жобалардың жүзеге асырылу барысы қаралды, деп хабарлайды DKNews.kz.
Премьер-министр Мемлекет басшысы туризм саласын дамытуға ерекше көңіл бөліп отырғанын атап өтті.
«Туристік саланы дамыту мәселесі Мемлекет басшысының тұрақты бақылауында. Президент Алатау қаласын дамыту жөніндегі кеңесте туризм инвестициялық тартымдылықтың өте маңызды бөлігі екенін атап өтті. Ол үшін жұрт жаз айларында ғана емес, жыл бойы демалатындай жағдай жасап, тиісті инфрақұрылымды дамыту қажет», — деді Олжас Бектенов.
Туристер саны мен инвестиция көлемі өсті
Туризм және спорт министрлігінің мәліметінше, 2025 жылы елдегі орналастыру орындарында демалған ішкі туристер саны 8,7 млн адамға жеткен. Бұл өткен жылмен салыстырғанда 12 пайызға көп.
Ал шетелдік келушілер саны 15,7 млн адамды құрап, бір жылда 500 мың адамға артқан. Туризм саласына тартылған инвестиция көлемі 33 пайызға өсіп, 1,3 трлн теңгеге жетті.
Президент сын айтқан мәселелер назарда
Үкімет отырысында өңірлердегі туристік инфрақұрылымды дамыту қарқыны жеткіліксіз екені айтылды.
Премьер-министр Мемлекет басшысының жақында Алматы облысына сапары кезінде туристік әлеуеттің толық пайдаланылмай отырғанын және инфрақұрылымды жедел дамыту қажеттігін сынға алғанын еске салды.
Осыған байланысты барлық әкімдіктерге:
- туристердің қауіпсіздігін қамтамасыз ету;
- қызмет көрсету сапасын арттыру;
- туристік инфрақұрылымды дамыту;
- демалыс орындарының жайлылығын жақсарту
бойынша жұмысты күшейту тапсырылды.
Almaty SuperSki жобасына ерекше назар аударылды
Жиында ірі туристік жобалардың бірі — Almaty SuperSki тау шаңғысы кластерін құру мәселесі қаралды.
Жоба аясында:
- ұзындығы 60 шақырымнан асатын тау шаңғысы трассалары;
- 11 заманауи аспалы жол;
- туристік және сервистік инфрақұрылым нысандары салынбақ.
Жобаның тәулігіне 10 мыңнан астам турист қабылдау мүмкіндігі болады.
Экология және табиғи ресурстар министрлігі жүргізілген зерттеулер жобаның қоршаған ортаға кері әсер етпейтінін көрсеткенін мәлімдеді.
Экотуризмді дамытуға жаңа ұсыныстар әзірленеді
Премьер-министр экотуризмді дамыту мәселесіне де тоқталды.
Былтыр Қазақстандағы ұлттық парктер мен табиғи аумақтарға келген экотуристер саны 3,6 миллионнан асты. Елдегі негізгі экотуристік бағыттардың қатарында:
- Шарын шатқалы;
- Көлсай көлдері;
- Алтын-Емел ұлттық паркі;
- Іле-Алатауы ұлттық паркі;
- Бурабай;
- Баянауыл
бар.
Осыған байланысты Туризм және спорт министрлігіне, Экология министрлігіне және әкімдіктерге бір ай ішінде экотуризмді дамыту бойынша нақты ұсыныстар енгізу тапсырылды.
Қауіпсіздік күшейтіледі
Жазғы туристік маусым қарсаңында қауіпсіздік мәселесіне ерекше назар аударылды.
Төтенше жағдайлар министрлігінің мәліметінше:
- 500-ге жуық туристік нысан мен жағажай тексерілді;
- 800-ге жуық қауіпсіздік талаптарының бұзылуы анықталды;
- барлық анықталған кемшіліктер бойынша шаралар қабылданды.
Сонымен қатар туристік аймақтарда:
- құтқару бекеттері көбейтіледі;
- мониторинг күшейтіледі;
- ақпараттық белгілер орнатылады;
- цифрлық бақылау жүйелері кезең-кезеңімен енгізіледі.
Көлік пен орналастыру мәселесі шешілуі тиіс
Премьер-министр туристер тарапынан көлік қатынасына қатысты шағымдардың жиі түсетінін айтты.
Атап айтқанда:
- әуе билеттерінің тапшылығы;
- теміржол билеттерінің жетіспеуі;
- бағалардың қолжетімділігі
мәселелері көтерілді.
Осыған байланысты Көлік министрлігіне әуе компанияларымен және «Қазақстан темір жолымен» бірлесіп, танымал туристік бағыттарға қосымша рейстер мен орындар санын арттыру тапсырылды.
Сондай-ақ өңір әкімдіктеріне кемпингтер мен автоүйлерге арналған тұрақтар мен арнайы алаңдарды инфрақұрылыммен қамтамасыз ету міндеті жүктелді.
Қызмет көрсету сапасы басты назарда
Олжас Бектенов туристік саланың табысы тек табиғи нысандар мен қонақүйлерге ғана емес, қызмет көрсету мәдениетіне де байланысты екенін атап өтті.
«Қорытындай келе, тағы бір маңызды мәселеге назар аударамын. Туризм саласы қарқынды дамыған елдерде демалыс сапасы көбіне жайлы қонақ үйлермен немесе әралуан туристік бағыттармен ғана емес, келушілерге күнделікті қызмет көрсететін мамандардың кәсіби деңгейімен де айқындалады. Бұл жергілікті тұрғындардың қонақжайлық қасиетіне де тікелей байланысты», — деді Премьер-министр.
Үкімет туристерге көрсетілетін қызмет сапасын арттыруды негізгі міндеттердің бірі ретінде белгіледі. Жалпы үйлестіру жұмыстары Премьер-министрдің орынбасары – мәдениет және ақпарат министрі Аида Балаеваға жүктелді.
