23 маусымда «Ауыл» партиясының кезектен тыс Съезі өтіп, партияның алдағы даму бағыты мен ұйымдық өзгерістеріне қатысты маңызды шешімдер қабылданды, деп хабарлайды DKNews.kz.
Жиын барысында партияның ағымдағы міндеттері талқыланып, Қазақстан Республикасының жаңа Конституциясына сәйкес партия Жарғысына өзгерістер мен толықтырулар енгізу мәселесі қаралды.
Серік Егізбаев төрағалық қызметінен кетті
Съезд барысында Серік Егізбаев «Ауыл» партиясының төрағасы қызметінен кететінін мәлімдеді.
Ол бұл шешім партияның жаңарған саяси жағдайда тиімді жұмыс істеуімен байланысты екенін айтты.
«Бүгінгі саяси сәт барлық прогрессивті күштерден қоғамның жаңару туралы сұранысына лайықты жауап беруді талап етеді. Бұл сұраныс конституциялық реформа барысында дәлелденді. «Ауыл» партиясы осы үдерістерден шетте қала алмайды, керісінше, партия олардың белсенді қатысушысы, ал бұл үшін аграрлық және әлеуметтік күн тәртібіне жаңа көзқарастар әкелуді, жаңартылған саяси жүйеде тиімді жұмыс істеуді қажет етеді. Сондықтан партия төрағасы қызметімді тоқтатуым партияның ішкі динамикаға дайындығын және жаңа саяси жүйеде алдағы сайлауға толыққанды қатысуға ниеттілігін көрсететін заңды қадам болады. Сонымен қатар, мен партия мақсаттарына адалмын және жаңа төрағаға партия қызметінің сабақтастығы мен тұрақтылығын қамтамасыз ету үшін жан-жақты қолдау көрсетуге дайынмын және партия қатарында белсенді қызмет жасаймын».
Партия тізгінін Қайрат Айтуғанов қолға алды
Серік Егізбаев съезд делегаттарының қарауына партия төрағасының орынбасары Қайрат Айтуғановтың кандидатурасын ұсынды.
Делегаттар ұсынысты бірауыздан қолдап, Қайрат Айтуғановты «Ауыл» партиясының жаңа төрағасы етіп сайлады.
Қайрат Айтуғановтың тәжірибесі қандай?
Қайрат Қапарұлының аграрлық экономика, мемлекеттік басқару және ғылыми салада 40 жылдан астам еңбек өтілі бар.
Әр жылдары ол:
- Қазақстан Республикасы Ауыл шаруашылығы министрлігінің бірінші вице-министрі болды;
- министрлік аппаратын басқарды;
- Халықаралық қайта құру және даму банкі жобасын басқарды;
- «Оңтүстік» әлеуметтік-кәсіпкерлік корпорациясын басқарды;
- Қарағанды облысы әкімінің орынбасары қызметін атқарды;
- «ҚазАгро» холдингінде басшылық қызметте болды;
- Қазақстан Кәсіподақтар федерациясы төрағасының орынбасары болды.
Сондай-ақ Ұлттық аграрлық ғылыми-білім беру орталығы директорлар кеңесінің төрағасы және С.Сейфуллин атындағы Қазақ агротехникалық университетінің басқарма төрағасы қызметтерін атқарған.
Партиядағы жұмысы барысында ауылдық аумақтарды дамытуға бағытталған заңнамалық және бағдарламалық бастамаларды әзірлеуге белсенді қатысқан.
Жарғыға өзгерістер енгізілді
Съезд қорытындысы бойынша делегаттар жаңа Конституция талаптарына сәйкес партия Жарғысына өзгерістер мен толықтырулар енгізу туралы шешім қабылдады.
Партия өкілдерінің айтуынша, бұл өзгерістер ұйымның жаңартылған саяси жүйедегі қызметін жетілдіруге және алдағы міндеттерді тиімді іске асыруға мүмкіндік береді.
Бұл нені білдіреді?
«Ауыл» партиясындағы кадрлық өзгеріс Қазақстандағы саяси жаңғыру үдерістерімен тұспа-тұс келіп отыр.
Сарапшылардың пікірінше, Қайрат Айтуғановтың сайлануы партияның аграрлық бағыттағы бастамаларын күшейтіп, ауылдық аумақтарды дамытуға қатысты ұсыныстарын жүйелі түрде ілгерілетуге мүмкіндік береді.
Сонымен қатар жаңа басшылық партияның алдағы сайлау науқандарына дайындалуы мен жаңа Конституция аясындағы саяси өзгерістерге бейімделуінде маңызды рөл атқаруы мүмкін.
