Президент Қасым-Жомарт Тоқаев БАҚ қызметкерлерін марапаттау рәсімінде сөз сөйлеп, журналистерді кәсіби мерекесімен құттықтады. Мемлекет басшысы ақпарат саласы мамандарының қоғамдағы рөлін ерекше атап өтіп, олардың жаңа Конституцияны әзірлеу мен талқылау кезеңіндегі еңбегіне жоғары баға берді, деп хабарлайды DKNews.kz.
Салтанатты жиында Президент медиа саласының үздік өкілдеріне мемлекеттік наградалар табыстап, биыл алғаш рет өңірлік журналистерге де баспана берілетінін мәлімдеді. Оның айтуынша, ақпарат құралдары елдің дамуы мен қоғамдық сананың жаңаруында маңызды миссия атқарып келеді.
Президент журналистердің еңбегін жоғары бағалады
Қасым-Жомарт Тоқаев журналистерді қоғамның жаршысы әрі халықтың шынайы жанашыры деп атады. Президенттің айтуынша, қазіргі цифрлық дәуірде жедел әрі сенімді ақпарат тарату бұрынғыдан да маңызды.
«Бұл кәсіби мерекенің ел өмірінде алатын орны айрықша. Себебі журналистер қауымы – ең алдымен қоғамның жаршысы әрі шынайы жанашыры. Сіздер әрдайым халықтың көкейінде жүрген өзекті мәселелерді көтеріп, жұрт мүддесіне адал қызмет етіп келесіздер. Қазіргі жаһандық технология дамыған заманда азаматтарға жедел, сапалы әрі шынайы ақпарат тарату, ұтымды сараптама ұсыну да журналистер қауымына жүктелген абыройлы міндет саналады. Мемлекет сіздердің ерен еңбектеріңізді жоғары бағалайды. Ел Президенті ретінде бүгін мен барша медиа саласы мамандарына шынайы ризашылығымды білдіремін», – деді Мемлекет басшысы.
Тоқаев: Журналистер жаңа Конституцияның тең авторларының бірі
Президент биылғы конституциялық реформаны Қазақстанның тарихи бетбұрысы деп бағалап, осы үдерісте бұқаралық ақпарат құралдарының ерекше рөл атқарғанын айтты.
Оның сөзінше, Конституциялық комиссияның жұмысы, ұсынылған түзетулер мен референдумға қатысты ақпараттар халыққа жан-жақты әрі түсінікті түрде жеткізілді. Соның арқасында Ата заң жобасын талқылау жалпыхалықтық пікірталасқа айналды.
«Сондықтан журналистер қауымын жаңа Ата заңымыздың тең авторларының бірі деп айтсақ, қате болмайды», – деді Қасым-Жомарт Тоқаев.
1 шілдеден бастап Қазақстан жаңа кезеңге қадам басады
Президент жаңа Конституцияның заңды күшіне енуі ел дамуының жаңа дәуірін бастайтынын айтты.
Оның пікірінше, Негізгі заңда:
- Егемендік пен Тәуелсіздікті қорғау;
- азаматтардың құқықтары мен бостандықтарын сақтау;
- Заң мен тәртіп қағидатын нығайту;
- білім, ғылым және инновацияны дамыту;
- еңбекқорлық пен отаншылдықты дәріптеу;
- халықтың әл-ауқатын арттыру сияқты стратегиялық бағыттар бекітілген.
«Бірнеше күннен соң, яғни 1 шілдеде Конституциямыз заңды күшіне енеді. Қазақстан түбегейлі жаңа дәуірге қадам басады», – деді Президент.
Дәстүрлі БАҚ өз маңызын жоғалтпайды
Қасым-Жомарт Тоқаев әлеуметтік желілердің ықпалы артқанымен, дәстүрлі ақпарат құралдарының қоғамдағы орны сақталатынын айтты.
Президенттің пікірінше, газет пен телеарнаның басты артықшылығы – оқиғаны терең талдап, сапалы сараптама ұсына алуында.
«Мен "Дәстүрлі медианың дәурені өтті" деген пікірмен келіспеймін. Керісінше, газеттер мен телеарналар жаңа форматқа көшіп, инновациялық мультимедиялық платформа құрып, заман талабына сай дамып келеді», – деді Мемлекет басшысы.
Дипфейк пен жалған ақпаратқа қарсы күрес күшейеді
Президент қазіргі кезде жасанды интеллект арқылы жасалатын жалған ақпараттың қауіптілігі артып отырғанына назар аударды.
Оның айтуынша, дипфейктер мен боттар қоғамдық пікірге ықпал етіп, мемлекеттік институттарға деген сенімге нұқсан келтіруі мүмкін. Сондықтан журналистер кәсіби жауапкершілікті күшейтіп, шынайы ақпарат тарату ісінде маңызды рөл атқаруы қажет.
Журналистерге жаңа қолдау көрсетіледі
Мемлекет басшысы ақпарат саласы қызметкерлерін әлеуметтік қолдау жалғасатынын айтты.
Соңғы үш жылда Астанада 200 журналист баспаналы болған. Биыл бұл тәжірибе алғаш рет өңірлерге де таралады.
«Жалпы, биылдың өзінде бүкіл еліміз бойынша ақпарат саласының 66 қызметкеріне баспана беріледі. Бәріңізге құтты болсын деймін!» – деді Президент.
Үздік журналистер мемлекеттік награда алды
Салтанатты рәсімде Қасым-Жомарт Тоқаев журналистика мен телевизияның дамуына үлес қосқан бірқатар БАҚ қызметкерлерін мемлекеттік наградалармен марапаттады.
Сонымен қатар журналистерге Президенттің бұқаралық ақпарат құралдары саласындағы сыйлығы, гранты және Алғысы табысталды. Президент 106 жастағы алғашқы қазақ теледикторларының бірі Зұлқия Жұматованы «Құрмет» орденімен марапаттау туралы шешім қабылдағанын да жариялады.
