ҚР Еңбек және халықты әлеуметтік қорғау министрі Асқарбек Ертаев Халықаралық еңбек ұйымының (ХЕҰ) Лайықты еңбек мәселелері бойынша техникалық қолдау тобының және Шығыс Еуропа мен Орталық Азия елдеріне арналған бюросының директоры Михаил Пушкинмен кездесті, деп хабарлайды DKNews.kz.
Тараптар Қазақстандағы лайықты еңбекті ілгерілету жөніндегі бірлескен Жол картасының нәтижелерін қорытындылап, жаңа Елдік бағдарламаны әзірлеу бағыттарын талқылады.
Жол картасы аясында маңызды жобалар жүзеге асырылды
Кездесу барысында Асқарбек Ертаев Қазақстан мен ХЕҰ арасындағы ынтымақтастықтың тұрақты дамып келе жатқанын атап өтті.
Министрдің айтуынша, бірлескен Жол картасы аясында еңбек қауіпсіздігі мен еңбек инспекциясы саласында үш талдамалық жоба іске асырылған.
Қазіргі уақытта:
- ХЕҰ-ның №176 Конвенциясын (шахталардағы еңбек қауіпсіздігі туралы) ратификациялау жөніндегі заң жобасы «Ашық НҚА» порталында жарияланды;
- 2026 жылға арналған заң шығару жұмыстары шеңберінде кәсіптік тәуекелдерді басқарудың проактивті жүйесіне көшуге бағытталған түзетулер әзірленді.
Әлеуметтік қорғау мен еңбекақы жүйесі жетілдірілуде
Кездесу барысында еңбекақы төлеу және әлеуметтік қамсыздандыру жүйесін дамыту мәселелері де қаралды.
Бүгінде Қазақстанда:
- ең төменгі жалақы мөлшерін айқындаудың жаңа әдістемесі енгізілді;
- ХЕҰ-ның №131 Конвенциясы ратификацияланды;
- әлеуметтік қамсыздандырудың ең төменгі нормалары туралы №102 Конвенцияны ратификациялау жөніндегі заң жобасы мемлекеттік органдардың келісуінде қаралып жатыр.
Сонымен қатар №190 Конвенцияны ратификациялауға дайындық аясында қызметкерлерді жұмыс орнындағы харассменттен қорғауға арналған заңнамалық түзетулердің алғашқы пакеті әзірленді.
Жаңа Елдік бағдарлама қандай бағыттарды қамтиды?
Асқарбек Ертаев Қазақстан жаңа кезеңдегі ынтымақтастықты одан әрі дамытуға дайын екенін айтты.
«Біз қалыптасқан сындарлы ынтымақтастықты жоғары бағалаймыз және Елдік бағдарламаны әзірлеу мен іске асыруды қамтитын жаңа кезеңде өзара іс-қимылды одан әрі дамытуға дайын екенімізді растаймыз», – деді ҚР ЕХӘҚМ басшысы.
Ынтымақтастықтың жаңа форматына көшу жөніндегі қағидатты келісім биыл маусым айында ХЕҰ Бас директоры Жильбер Унгбомен өткен кездесу барысында жасалған.
Болашақ бағдарламаның негізгі бағыттары:
- әлеуметтік қорғау жүйесін жаңғырту;
- әлеуметтік әріптестікті дамыту;
- қауіпсіз еңбек жағдайларын қамтамасыз ету;
- жұмыс орнындағы қысым көрсету әрекеттерінің алдын алу;
- цифрландыру мен жасанды интеллектінің еңбек нарығына әсерін зерделеу.
ХЕҰ Қазақстанмен ынтымақтастықты жалғастыруға дайын
Кездесу қорытындысында Асқарбек Ертаев алдағы бірлескен жұмыстардың әлеуметтік әділеттілік пен орнықты даму мақсаттарына қол жеткізуге ықпал ететініне сенім білдірді.
«Біздің алдағы ынтымақтастығымыз әлеуметтік әділеттілік пен орнықты даму саласындағы ортақ мақсаттарға қол жеткізуге ықпал етеді деп сенемін», – деп түйіндеді Асқарбек Ертаев.
Өз кезегінде Михаил Пушкин Қазақстанда жаңа Елдік бағдарламаны әзірлеу және іске асыру жұмыстарына жан-жақты қолдау көрсетуге дайын екенін мәлімдеді.
Кездесуге сондай-ақ ҚР Еңбек және халықты әлеуметтік қорғау министрлігінің құрылымдық бөлімшелерінің басшылары, ХЕҰ бюросының еңбек инспекциясы және еңбек қауіпсіздігі жөніндегі маманы Дарко Дочинский және ХЕҰ-ның Астанадағы жобалық кеңсесінің ұлттық жоба үйлестірушісі Сауле Исабекова қатысты.
Бұл не үшін маңызды?
Қазақстан мен Халықаралық еңбек ұйымының жаңа Елдік бағдарламасы еңбек қауіпсіздігін күшейтуге, әлеуметтік қорғау жүйесін жаңғыртуға және еңбек нарығын заманауи талаптарға бейімдеуге бағытталған. Сонымен қатар құжат цифрландыру мен жасанды интеллектінің еңбек саласына ықпалын ескеріп, халықаралық еңбек стандарттарын енгізуге мүмкіндік береді.
