Үлкен Алматы шыңына көтерілген екі жас жігіт бірнеше сағат бойы байланыссыз қалып, оларды құтқарушылар 3680 метр биіктіктен іздеп тапты, деп хабарлайды DKNews.kz.
27 маусым күні таңертең 2003 және 2004 жылы туған екі турист Үлкен Алматы шыңына көтерілген.
Олар кешке дейін қайтуы тиіс болған. Алайда белгіленген уақытта жақындарына хабарласпай, ұялы телефондары да желі аймағынан тыс қалған.
Дәл осыдан кейін олардың туыстары 112 қызметіне хабар берген.
Соңғы геолокация шыңның солтүстік бөлігінде анықталған
Алдын ала мәлімет бойынша, туристердің соңғы геолокациясы 27 маусым күні шамамен сағат 17:00-де Үлкен Алматы шыңының солтүстік беткейінде тіркелген.
Хабарлама түскен бойда Төтенше жағдайлар министрлігінің құтқарушылары іздестіру жұмыстарына шықты.
Туристер аман табылды
Бірнеше сағатқа созылған іздеу нәтижесінде екі жас жігіт те аман-есен табылды.
Құтқарушылар оларды 3680 метр биіктіктен төмен түсіріп, экопостқа дейін жеткізді.
Абырой болғанда, екеуіне де медициналық көмек қажет болған жоқ.
ТЖМ маңызды ескерту жасады
Ведомство азаматтарды тауға шығар алдында қауіпсіздік талаптарын сақтауға шақырды.
«Туристерге таулы аймаққа шығар алдында маршрут пен болжамды қайту уақытын жақындарына алдын ала хабарлауды, сондай-ақ ауа райы жағдайы мен маршруттың күрделілік деңгейін ескеруді ұсынамыз», – деп ескертті ТЖМ.
Неге бұл маңызды?
Алматы тауларында жаз мезгілінде туристер саны күрт көбейеді. Алайда биік тауда ауа райы бірнеше минуттың ішінде өзгеруі мүмкін, ал байланыс барлық жерде бірдей ұстай бермейді.
Сондықтан мамандар жорыққа шығар алдында маршрутты алдын ала жоспарлап, жақындарына хабарлап кетуге және қажетті қауіпсіздік құралдарын өзімен бірге алып жүруге кеңес береді.
