Жаңа Конституция күшіне енгеннен кейін Қазақстанда не өзгереді?

1 шілдеден бастап Қазақстанда жаңа Конституция ресми түрде күшіне енді.

Бұл тек құқықтық құжаттың жаңаруы емес, елдің алдағы ондаған жылдағы даму бағытын айқындайтын тарихи кезеңнің бастауы, деп хабарлайды DKNews.kz.

Үкіметте өткен алғашқы кеңесте Премьер-министр Олжас Бектенов негізгі басымдықтарды атап, реформалардың ендігі міндеті – Конституция нормаларын нақты өмірде іске асыру екенін айтты.

Үкіметтің кезекті отырысында жаңа Конституцияны сапалы жүзеге асыру мәселесі қаралды. Отырысқа төрағалық еткен Премьер-министр Олжас Бектенов бұл құжат Қазақстанның саяси, құқықтық және экономикалық жүйесін жаңа деңгейге көтеретін институционалдық негіз қалыптастыратынын айтты.

Оның сөзінше, Конституцияның күшіне енуі елдің жаңғыру жолындағы жаңа кезеңінің басталғанын білдіреді.

«Бүгін Қазақстан Республикасының жаңа Конституциясы күшіне енді. Бұл – еліміздің алдағы онжылдықтардағы даму бағдарын айқындайтын негізгі құжат. Ата заңның қабылдануы Қасым-Жомарт Кемелұлы Тоқаевтың басшылығымен жүзеге асырылып жатқан елімізді жаңғыртудың жаңа кезеңін азаматтарымыздың жаппай қолдайтынын анық көрсетті. Жаңа Конституция экономикалық көрсеткіштермен ғана өлшенбейтін озық әрі қарқынды дамудың берік институционалдық негізін қалыптастырады. Президент жаһандық өзгерістердің көшін қуып жетумен ғана шектелмей, жаңа экономикалық ахуалды қалыптастыратын белсенді қатысушыға айналуымыз керек екенін атап өтуде», — деді Олжас Бектенов.

Конституцияның басты міндеті – тұрақты даму

Премьер-министрдің айтуынша, Конституцияның қабылдануымен елдегі мемлекеттік және қоғамдық институттарды кешенді жаңғырту кезеңі басталды.

Бұл өзгерістер тек заңнаманы жетілдірумен шектелмейді. Олар мемлекеттік басқару сапасын арттыруға, азаматтардың құқықтарын қорғауды күшейтуге және экономиканың жаңа талаптарға бейімделуіне бағытталған.

Үкіметтің алдында тұрған негізгі міндеттердің бірі – Конституцияда бекітілген қағидалардың нақты іске асуын қамтамасыз ету. Бұл мемлекеттік органдардың күнделікті жұмысынан бастап, азаматтардың құқықтарын қорғау тетіктеріне дейінгі барлық бағытты қамтиды.

«Заң мен Тәртіп» қағидаты күшейеді

Үкімет отырысында жүргізіліп жатқан реформалардың түпкі мақсаты қоғамдағы тұрақтылықты сақтау, халықтың өмір сүру сапасын жақсарту және құқық үстемдігін нығайту екені ерекше айтылды.

Олжас Бектеновтің сөзінше, өзгерістер бірнеше маңызды бағытқа негізделген:

• қоғамдағы тұрақтылықты сақтау;
• азаматтардың әл-ауқатын арттыру;
• «Заң мен Тәртіп» қағидатын нығайту;
• тиімді мемлекеттік институттарды қалыптастыру;
• жоғары білімді әрі интеллектуалды жаңа буынды тәрбиелеу.

Бұл басымдықтар Қазақстанның ұзақ мерзімді даму стратегиясының өзегіне айналмақ.

Жаңа экономикалық кезеңге бағыт

Премьер-министр Президент Қасым-Жомарт Тоқаевтың ұстанымына тоқталып, қазіргі әлемдік жағдайда Қазақстан тек өзгерістерге бейімделіп қана қоймай, жаңа экономикалық үрдістерді қалыптастыратын мемлекеттердің қатарынан орын алуға ұмтылуы тиіс екенін айтты.

Осыған байланысты жаңа Конституция елдің инвестициялық тартымдылығын арттыруға, құқықтық тұрақтылықты күшейтуге және мемлекеттік басқарудың тиімділігін көтеруге бағытталған ұзақ мерзімді реформалардың құқықтық негізі ретінде қарастырылып отыр.

Ал Үкіметтің алдағы жұмысы осы конституциялық нормалардың толық әрі тиімді орындалуын қамтамасыз етуге бағытталмақ.