Қазақстан құрамасы Қырғызстанда өтіп жатқан Орталық және Солтүстік Азияның жастар арасындағы 2026 жылғы шахмат чемпионатын сәтті бастады. Рапид бағдарламасының қорытындысы бойынша отандастарымыз 9 медаль жеңіп алып, оның үшеуі алтын болды, деп хабарлайды DKNews.kz.
Жарыс Қырғызстанның Қорумду ауылында өтіп жатыр.
Қазақстан қоржынына үш алтын түсті
Рапид турнирінде алтын медаль иегерлері:
- Алихан Сағынтаев (O10);
- Юрий Пак (O12);
- Бибісара Ержан (G14).
Күміс жүлдені:
- Әлинур Бауыржан (O8);
- Нұрислам Сұлтанхан (O10);
- Алдияр Жарас (O14) иеленді.
Қола медальдарды:
- Нармина Асылбекқызы (G8);
- Ақниет Құмысбай (G10);
- Айлин Зарқым (G16) жеңіп алды.
Турнирге алты елдің үздік жас шахматшылары қатысуда
Чемпионатқа Қазақстан, Қырғызстан, Тәжікстан, Түрікменстан, Өзбекстан және Ресейден 479 жас шахматшы жиналды.
Ең көп құраммен жарыс қожайыны Қырғызстан қатысып отыр. Ел намысын 193 спортшы қорғауда.
Жеңімпаздар жеті жас санатында анықталады
Чемпионат ұлдар мен қыздар арасында бөлек өткізіліп, жеті жас санатын қамтиды.
Жарыс мына санаттар бойынша өтуде:
- O08/G08;
- O10/G10;
- O12/G12;
- O14/G14;
- O16/G16;
- O18/G18;
- O20/G20.
Биылғы чемпионаттың маңызы артты
2026 жылдан бастап Қазақстанда жас шахматшыларды қолдау бағдарламасына өзгеріс енгізілді.
Енді Батыс Азия чемпионатының орнына Орталық және Солтүстік Азия чемпионатының нәтижелері есепке алынады. Сондықтан Central and North Asian Youth U8–U20 Chess Championship 2026 жас спортшылар үшін ерекше маңызға ие.
Чемпионат 8 шілдеге дейін жалғасады. Рапид турнирінен кейін қатысушылар классикалық шахмат пен блиц бағдарламасында да бақ сынайды.
Неліктен бұл маңызды?
Орталық және Солтүстік Азия чемпионаты енді Қазақстандағы жас таланттарды қолдау жүйесінің маңызды бөлігіне айналды. Сондықтан бұл жарыстағы жоғары нәтиже жас шахматшылардың халықаралық тәжірибе жинақтауына, рейтингін көтеруіне және болашақтағы ірі турнирлерге жол ашуына мүмкіндік береді.
