Қазақстан Республикасының Өнеркәсіп және құрылыс министрлігі Бірыңғай тауарларды таңбалау және қадағалау операторымен бірлесіп тұрмыстық химия және косметикалық өнімдерді цифрлық таңбалау және қадағалау жөніндегі пилоттық жобаны аяқтады, деп хабарлайды DKNews.kz.
Жоба цифрлық таңбалау жүйесінің техникалық мүмкіндіктерін бағалауға және оны өндірушілер мен сауда желілерінің жұмыс үдерістеріне енгізудің тиімді тәсілдерін анықтауға бағытталды.
Пилоттық жобаға кімдер қатысты?
Жобаға тауар өткізу тізбегінің түрлі кезеңдерінен 20 ұйым қатысты.
Олардың қатарында:
- 7 отандық өндіруші;
- импорттаушылар;
- көтерме және бөлшек сауда өкілдері болды.
Жоба аясында сәйкестендіру құралдарын енгізудің әртүрлі тәсілдерін бағалауға мүмкіндік берген 12 технологиялық сынақ өткізілді.
Қандай өнімдер қамтылды?
Сынақтар СЭҚ ТН кодтары бойынша жеті тауар тобын қамтыды.
Олардың ішінде:
- сабын;
- жуу және тазалау құралдары;
- макияжға арналған косметика;
- шаш күтімі құралдары;
- ауыз қуысына күтім жасау өнімдері бар.
Қатысушылар цифрлық таңбалау жүйесінің толық циклін сынақтан өткізді.
Атап айтқанда:
- таңбалау кодтарын алу;
- өнімді таңбалау;
- агрегациялау;
- бақылау-касса машиналары арқылы өнімді айналымнан шығару.
Сынақтар нақты өндірісте жүргізілді
Практикалық апробация қазақстандық өндірушілер мен ірі импорттаушылардың өндірістік және қойма алаңдарында өтті.
Жобаға қатысқан кәсіпорындардың қатарында:
- «МедиДез» ҒӨБ» ЖШС;
- «Аврора» ӨК ЖШС;
- «ПрофХим» ЖШС;
- «Вита Вент» ЖШС;
- «Проктер энд Гэмбл Қазақстан Дистрибьюшн» ЖШС;
- «Amway Central Asia» ЖШС және басқа компаниялар болды.
Сынақ барысында этикеткалау мен өнімге тікелей басып шығару тәсілдерінің тиімділігі бағаланды.
Өндірушілер қандай пікір білдірді?
«МедиДез» ҒӨБ» ЖШС өндірістік цехының мастері Әмір Өтенов пилоттық жоба жаңа жүйенің нақты өндірістегі жұмысын бағалауға мүмкіндік бергенін айтты.
«Өндірушілер үшін жаңа цифрлық шешімдердің салалық ерекшелік пен нақты өндірістік процестерді ескере отырып енгізілуі ерекше маңызды. Дәл осы себепті пилоттық форматтың практикалық маңызы зор. Ол түрлі технологиялық шешімдерді сынақтан өткізуге, сәйкестендіру құралдарын енгізудің ең тиімді тәсілдерін айқындауға және реттеушілік шешімдер қабылданғанға дейін туандауы мүмкін мәселелерді алдын ала пысықтауға мүмкіндік береді. Мұндай тәсіл мемлекеттің міндеттері мен бизнестің мүдделерін ескеретін теңгерімді тетіктерді әзірлеуге ықпал етеді».
Нәтижелер қалай пайдаланылады?
Министрліктің мәліметінше, пилоттық жобаның қорытындылары тұрмыстық химия мен косметикалық өнімдерді цифрлық таңбалау бойынша болашақ шешімдерді әзірлеу кезінде ескеріледі.
Жиналған деректер:
- саланың техникалық дайындығын бағалауға;
- цифрлық шешімдерді қолданыстағы бизнес-процестерге енгізу ерекшеліктерін анықтауға;
- нормативтік реттеуді жетілдіруге қатысты ұсыныстар әзірлеуге мүмкіндік берді.
Министрлік цифрлық таңбалау жүйесін дамыту жөніндегі барлық шешімдер пилоттық жобалардың нәтижелері, бизнес қауымдастығының пікірі және салалық ерекшеліктер негізінде қабылдануы тиіс екенін атап өтті.
Бұл неге маңызды?
Цифрлық таңбалау жүйесі тауарлардың қозғалысын толық бақылауға, көлеңкелі айналымды азайтуға және тұтынушылардың қауіпсіздігін күшейтуге мүмкіндік береді. Сонымен қатар пилоттық жобалар жаңа талаптардың өндірушілер мен импорттаушыларға әсерін алдын ала бағалап, цифрлық жүйелерді кезең-кезеңімен енгізуге жағдай жасайды.
