Астанада өткен «Зерделі ұлт болмысы» атты дөңгелек үстелде елде кітап оқу мәдениетін дамытудың жаңа тетіктері талқыланды. Жиында Мемлекет басшысының бастамаларын іске асыру, ұлттық әдебиетті қолдау, кітапханаларды цифрландыру және оқырмандарды ынталандыруға арналған жаңа жобалар таныстырылды, деп хабарлайды DKNews.kz.
Іс-шараны Астана қаласы әкімдігі мен Қазақстан Жазушылар одағының Астана филиалы Ұлттық академиялық кітапханада ұйымдастырды.
Қазақстанда жалпыұлттық кітап оқу жобасы іске қосылады
Мәдениет және ақпарат министрлігі Архив, құжаттама және кітап ісі комитеті Кітап ісі басқармасының басшысы Алмаз Мырзахметтің айтуынша, Президент тапсырмасына сәйкес жалпыұлттық кітап оқу жобасының ережесі әзірленіп, Үкіметтің қарауына енгізілген.
Жоба:
- мектеп оқушыларын;
- жастарды;
- ересек оқырмандарды қамтиды.
Қатысушылар әр 20 күн сайын бір кітап оқып, арнайы цифрлық платформада тест тапсырады.
«Бүгінде президент тапсырмасына сәйкес жалпыұлттық кітап оқу жобасының ережесі дайындалып, Үкіметтің қарауына енгізілді. Жоба мектеп оқушылары, жастар және ересектерді қамтиды. Қатысушылар жиырма күн сайын бір кітап оқып, арнайы платформада тест тапсырады. Әр ай сайын үздік жүз оқырман марапатталса, барлық кезеңнен үздік өткен қатысушыларға қомақты ақшалай сыйақы беру де қарастырылып жатыр».
Бірыңғай цифрлық кітап платформасы құрылады
Жиында кітапханаларды бірыңғай жүйеге біріктіру мәселесі де көтерілді.
Жоба іске асқанда:
- еліміздегі барлық кітапхана бір жүйеде жұмыс істейді;
- оқырмандар Қазақстанның кез келген кітапханасындағы кітапты бір ғана оқырман билетімен пайдалана алады;
- авторлар өз кітаптарын электронды түрде заңды негізде ұсына алады.
Алмаз Мырзахметтің айтуынша, электронды платформа арқылы оқырман кітапты ақылы оқыған жағдайда қаражат тікелей авторға түседі.
«Авторлар үшін де жаңа мүмкіндік жасалады. Электронды платформа арқылы кітаптарын заңды түрде ұсынуға, оқырман ақылы түрде оқыған жағдайда қаражаттың тікелей автордың өзіне түсуіне жағдай қарастырылып жатыр. Бұл қаламгерлердің еңбегін қолдаудың жаңа тетігі болады».
Кітап оқуды насихаттайтындарға ұлттық сыйлық тағайындалады
Министрлік кітап оқу мәдениетін дәріптеуге үлес қосып жүрген азаматтарға арналған ұлттық сыйлық әзірлеп жатыр.
Марапат:
- әдебиетті насихаттайтын медиа жобаларға;
- блогерлерге;
- кітап клубтарына;
- қоғамдық бастамаларға беріледі.
Сонымен қатар зиялы қауым өкілдеріне үш жас санатына арналған ең үздік оқылатын 15 кітаптың тізімін әзірлеу ұсынылды.
«Кітап оқу мәдениеті балабақшадан басталуы керек»
Дөңгелек үстелде қоғам қайраткерлері кітапқа қызығушылықты ерте жастан қалыптастырудың маңызын айтты.
Нұртөре Жүсіп балалар әдебиетін дамыту, аналардың кітап оқу мәдениетін қолдау және арнайы оқу жобаларын көбейтуді ұсынды.
«Ғалымдардың зерттеуі бойынша кітап оқитын баланың миының даму деңгейі әлдеқайда жоғары болады. Сондықтан «Зерделі ұлт» қалыптастырудың негізі – кітап оқу мәдениетін қалыптастыру».
Ал ақын Ғалым Жайлыбай бұл бастаманың ұзақмерзімді маңызын атап өтті.
«Біз кітаптың қасиетін қайтара білуіміз керек. Бұрын ауылдарға жазушылар келетін, олардың әр кездесуі балалар үшін үлкен рухани оқиға болатын. Қазір сондай байланысты қайта жаңғырту қажет. Сонымен бірге кітапты насихаттайтын жүйелі ұйымдық жұмыстар күшейтілуі тиіс».
Бұл неге маңызды?
Жаңа бастамалар Қазақстанда кітап оқуды ынталандырудың заманауи жүйесін қалыптастыруға бағытталған. Жалпыұлттық жоба, бірыңғай цифрлық кітап платформасы және кітап оқу мәдениетін дәріптейтін ұлттық сыйлық әдебиетке қызығушылықты арттырып, авторларды қолдауға және жастар арасында тұрақты оқу мәдениетін қалыптастыруға мүмкіндік береді.
