Қазақстандағы сауда саласы жыл басынан бері тұрақты өсім көрсетіп келеді. Алты айдың қорытындысы бойынша елдегі сауда көлемі 36,2 трлн теңгеге жетіп, өткен жылдың сәйкес кезеңімен салыстырғанда 15,3 пайызға артты. Бұл ішкі нарықтағы тұтынушылық белсенділіктің сақталып отырғанын әрі бизнестің сауда айналымын ұлғайтып жатқанын көрсетеді.
Бұл туралы Үкімет отырысында Сауда және интеграция министрі Арман Шаққалиев мәлімдеді, деп хабарлайды DKNews.kz.
Министрдің айтуынша, бірінші жартыжылдықта сауда саласының нақты көлем индексі 105,7 пайызды құрады. Оның ішінде көтерме сауда айтарлықтай өсіп, көлемі 24,5 трлн теңгеге, ал бөлшек сауда 11,5 трлн теңгеге жеткен.
«Нақты көлем индексі 105,7%-ды құрады, сауда көлемі 36,2 трлн теңгеге жетті, бұл өткен жылдың сәйкес кезеңінен 15,3%-ға артты. Көтерме сауда 6,6%-ға (24,5 трлн теңгеге), бөлшек сауда 3,8%-ға (11,5 трлн теңгеге) өсті. Жыл соңына дейін өңделген тауарлар бойынша сатудың болжамды көлемі кемінде 40 трлн теңгені құрауы тиіс», — деді Арман Шаққалиев.
Сауда қай өңірлерде қарқынды өсіп жатыр?
Бүгінде елдегі жалпы тауар айналымының 70 пайыздан астамы Алматы, Астана және Шымкент қалаларына, сондай-ақ Атырау мен Қарағанды облыстарына тиесілі.
Ал ең жоғары өсім көрсеткен өңірлер қатарында Павлодар, Солтүстік Қазақстан және Түркістан облыстары бар. Сонымен бірге Шымкент қаласы да сауда көлемінің қарқынды артуымен ерекшеленді.
Министрдің сөзінше, бұл өсімді сақтау үшін ішкі сауданы дамытуға бағытталған жүйелі шаралар жалғасады.
Мемлекет сауда инфрақұрылымын қолдауды жалғастырып жатыр
Сауда саласын дамыту үшін мемлекеттік қолдау бағдарламалары да кеңейіп келеді. Қазіргі уақытта жалпы құны 10 млрд теңгені құрайтын 978 жоба қаржыландырылған.
Сонымен қатар отандық өндірушілердің нарықтағы үлесін арттыруға ерекше көңіл бөлінуде. Сауда желілерімен бірлесіп қазақстандық өнімдерге арналған сөре кеңістігі ұлғайтылып жатыр. Бұған қоса, отандық тауар өндірушілердің бірыңғай тізілімімен үйлестірілген өнімдер каталогы әзірленуде.
Әкімдіктермен бірлескен жұмыстар аясында өнімсіз делдалдарға бақылау күшейтіліп, тауар қозғалысын кезең-кезеңімен қадағалау жүйесі енгізілген.
Шикізаттық емес экспорт та өсіп келеді
Қазақстанның шикізаттық емес экспорты да оң динамика көрсетіп отыр. Алғашқы жартыжылдықта шикізаттық емес тауарлар мен қызметтер экспорты 14,6 пайызға өсіп, 14,9 млрд АҚШ долларына жетті.
Министр экспорттаушыларды қолдау шараларының нәтижесінде халықаралық нарықтағы мүмкіндіктер кеңейіп жатқанын атап өтті.
«Бірінші жартыжылдықтың қорытындысы бойынша шикізаттық емес тауарлар мен қызметтер экспортының көлемі 14,6%-ға өсіп, $14,9 млрд-ты құрады. Экспорттаушыларды қолдау шаралары мен жеткізу географиясын дәйекті түрде кеңейтеміз. Жыл басынан бері 150-ден астам отандық компанияның қатысуымен 7 сауда-экономикалық миссия ұйымдастырылды. Нәтижесінде жалпы сомасы $700 млн-нан астам сомаға экспорттық келісімшарттарға қол қойылды. Экспорттық-кредиттік агенттік желісі бойынша 400 млрд теңгеден астам қаржылық қолдау көрсетілді. Жыл соңына дейін сақтандыру қолдауының сыйымдылығын 1,2 трлн теңгеге дейін арттыру жоспарлануда», — деді Арман Шаққалиев.
Министрлік сондай-ақ қазақстандық өнімдерді шетелдік ірі сауда желілерінің сөрелеріне шығаруға арналған жаңа тетікті іске қосқанын хабарлады. Ведомство жыл соңына дейін сауда саласы бойынша барлық негізгі көрсеткіштердің орындалуын қамтамасыз ету бағытындағы жұмысты жалғастырмақ.
