Қазақстанда мәдениет саласын жаңғырту қарқыны күшейіп келеді.
Биылғы алғашқы алты айдың қорытындысы көрсеткендей, бірқатар өңірлерде жаңа мәдениет үйлері салынып, театрлар жаңартылып, музей мен архив қорлары жаппай цифрландырылып жатыр, деп хабарлайды DKNews.kz.
Сонымен қатар креативті индустрияны дамытуға бағытталған жаңа жобалар іске қосылып, тарихи мұраны сақтауға арналған жұмыстар да жалғасуда.
Мәдениет және ақпарат министрлігінде өткен кеңесте Ұлытау, Жетісу, Ақмола, Ақтөбе және Батыс Қазақстан облыстарының жартыжылдық жұмысы сараланып, алдағы міндеттер айқындалды.
Ұлытауда Жошы хан кешені дамытылып, архивтер цифрландырылуда
Ұлытау облысында басты назар тарихи-мәдени мұраны сақтауға аударылған. Биыл Жошы хан тарихи-мәдени кешені облыстық тарихи-археологиялық музейдің теңгеріміне берілді. Бұл шешім кешенді ғылыми тұрғыдан дамыту мен туристік әлеуетін арттыруға мүмкіндік береді.
Сонымен қатар өңірде архив қорларын цифрландыру қарқыны айтарлықтай өскен. Алты ай ішінде шамамен 1,4 миллион бет архив құжаты электронды форматқа көшіріліп, өткен жылдың осы кезеңімен салыстырғанда көрсеткіш 36 пайызға артқан.
Өңірде екі археологиялық нысанда зерттеу жүргізіліп, үш тарихи ескерткіште реставрациялық жұмыстар басталған.
Ақмола креативті индустрияның жаңа алаңына айналуда
Ақмола облысы республикалық Creative Aimaq жобасына алғашқылардың бірі болып қосылды. Жоба аясындағы жәрмеңкеде 200-ден астам қолөнерші, дизайнер, суретші, стартапер және креативті бизнес өкілі бас қосты.
Өңірде қазір алты ірі мәдени инфрақұрылымдық жоба жүзеге асырылып жатыр. Бір ауылдық клуб пайдалануға берілсе, жыл басынан бері 18 шығармашылық үйірме ашылған. Жыл соңына дейін тағы 25 үйірме іске қосылады.
Ақтөбеде мәдени өмір қыза түсті: 18 мың шара және халықаралық рекорд
Ақтөбе облысында жарты жылдың ішінде 18 мыңнан астам мәдени іс-шара ұйымдастырылып, оған 1,7 миллионнан астам адам қатысқан.
Сонымен қатар төрт мәдениет нысанының құрылысы жүріп жатыр, тағы үш ғимарат күрделі жөндеуден өтуде.
Өңірдің ең жарқын оқиғаларының бірі – «Жыраулар жолымен…» жобасы болды. Оның аясында 36 жыршы «Қырымның қырық батыры» эпикалық циклін 24 сағат бойы үздіксіз орындап, нәтижесінде бұл жетістік Халықаралық рекордтар кітабына енгізілді.
Жетісуда жаңа мәдениет үйлері ашылып, дәстүрлі өнер иелері анықталды
Жетісу облысында алғашқы жартыжылдықта төрт ауылдық мәдениет үйі пайдалануға берілді. Жыл соңына дейін тағы бес мәдениет үйі мен аудандық кітапхананы ашу жоспарланып отыр.
Облыстық филармония жанынан камералық хор құрылса, Бикен Римова атындағы академиялық драма театрының репертуары бес жаңа қойылыммен толыққан.
Экспедициялар барысында сегіз аудан мен екі қалада материалдық емес мәдени мұраны сақтап жүрген 124 өнер иесі анықталған. Сонымен бірге Жаркент мешітін басқару жоспарын әзірлеу жұмыстары жалғасуда.
Батыс Қазақстанда театрлар жаңарып, кітапханалар заманауи форматқа көшуде
Батыс Қазақстан облысында 25 ауыл кітапханасы толық жаңғыртылып, жөнделіп, жаңа жабдықтармен қамтамасыз етілген әрі кітап қорлары толықтырылған.
Ғылыми реставрациядан кейін А.Н. Островский атындағы театр тарихи ғимаратына қайта оралса, Хадиша Бөкеева атындағы театр жаңа маусымын жаңартылған сахнада бастайды.
Өңірдегі маңызды жаңалықтардың бірі – Ғарифолла Құрманғалиев атындағы облыстық филармонияға «академиялық» мәртебесінің берілуі. Осыған байланысты 2026 жылдың екінші жартысынан бастап қызметкерлердің лауазымдық жалақысына 50 пайыздық үстемақы төленеді.
Сондай-ақ Жастар сарайының базасында «ÓzgeEpic Oral» креативті хабы ашылды.
Алдағы жоспар қандай?
Министрлікте өткен жиында тек атқарылған жұмыстар ғана емес, алдағы кезеңнің басым бағыттары да талқыланды. Олардың қатарында ауылдық мәдениет ұйымдарын жаңғырту, кадрлық әлеуетті күшейту, музей мен архив қорларын цифрландыруды жалғастыру, археологиялық зерттеулер мен ғылыми реставрация жұмыстарын кеңейту мәселелері бар.
Жылдың екінші жартысында өңірлерде мәдениет нысандарының құрылысы мен жөндеу жұмыстары жалғасады. Сонымен қатар музей экспозицияларын жаңарту, шығармашылық жобаларды жүзеге асыру және дәстүрлі өнерді насихаттайтын ауқымды фестивальдер өткізу жоспарланған.
Олардың қатарында «Дәнеш дауысы», «Жайық сазы», «Ұлытау үні», «Жезкиік» және Flamingo Fest фестивальдері бар.
Кеңес қорытындысында өңір әкімдіктеріне Мемлекет басшысы, Үкімет және Мәдениет және ақпарат министрлігі жүктеген тапсырмаларды сапалы әрі белгіленген мерзімде орындау, сондай-ақ жыл соңына дейін жоспарланған жобаларды толық аяқтау міндеті қойылды. Бұл жұмыстардың орындалуын Мәдениет комитеті тұрақты бақылауда ұстайды.
