Қазақстан «жасыл» авиация мен жаңа энергетика саласындағы ірі халықаралық жобаны іске қосуды көздеп отыр.
Алатау қаласы экологиялық технологияларды сынақтан өткізетін пилоттық алаңға айналуы мүмкін, деп хабарлайды DKNews.kz.
Қазақстан Республикасының Премьер-министрі Олжас Бектенов гонконгтық Full Vision Capital компаниясының негізін қалаушы доктор Питер Лимен кездесті.
Кездесу барысында экологиялық таза авиациялық отын (Sustainable Aviation Fuel, SAF) өндірісін дамыту, ақылды энергетика және энергия жинақтаудың заманауи жүйелерін енгізу бағытындағы ұзақмерзімді ынтымақтастық мәселелері талқыланды.
Алатауда пилоттық жоба іске қосылады
Тараптар Алатау қаласының аумағында алғашқы тәжірибелік пилоттық жобаны жүзеге асыруға ерекше назар аударды.
Олжас Бектенов арнайы құқықтық режим инвесторлар үшін қолайлы жағдай қалыптастырғанын айтты.
«"Алатау қаласының арнайы құқықтық режимі туралы" Конституциялық заң инвесторларға құқықтық айқындықты, тұрақты салық жағдайларын және "бір терезе" режимін ұсынады. Алатау қаласы технологиялар мен сіздің девелоперлік тәжірибеңізді локализациялау үшін пилоттық алаң бола алады. Үкімет барлық қажетті қолдауды көрсетуге дайын».
Green Kazakhstan жобасы бойынша меморандумға қол қойылды
Кездесу қорытындысында Alatau City Authority, Қазақстанның Энергетика, Ауыл шаруашылығы және Көлік министрліктері мен Full Vision Capital компаниясы арасында Green Kazakhstan жобасы бойынша өзара түсіністік туралы меморандумға қол қойылды.
Құжат аясында:
- тұрақты авиациялық отын өндірудің толық экожүйесін қалыптастыру көзделеді
- ауыл шаруашылығы шикізатын өсіруден бастап дайын өнім шығаруға дейінгі өндірістік тізбек пысықталады
- ақылды энергетика шешімдерін енгізу мүмкіндігі қарастырылады
- никель-сутекті энергия жинақтау жүйелерін пайдалану зерттеледі
- жаңартылатын энергия көздерін энергетикалық жүйеге интеграциялау жолдары зерделенеді
Full Vision Capital Қазақстанмен ұзақмерзімді серіктестікке ниетті
Доктор Питер Ли компанияның Қазақстанмен бірлескен жұмысы ұзақмерзімді әріптестікке негізделетінін айтты.
«Алатау қаласының "жасыл" трансформациясын қолдау мақсатында Қазақстан Үкіметімен ынтымақтастық орнату біз үшін үлкен мәртебе. Осы әріптестік аясында біз Алатауға, сондай-ақ Қазақстанға да тұрақты қала дамуының жаңа халықаралық стандартын қалыптастыруға көмектесетін инновациялық технологияларды енгізуді көздеп отырмыз».
Үкімет нақты тапсырмалар берді
Премьер-министр салалық министрліктер мен Alatau City Authority-ге пилоттық жобаларды іске асыруға жан-жақты қолдау көрсетуді тапсырды.
Full Vision Capital – «жасыл» экономика, интеллектуалды энергетика және экологиялық технологиялар бағытындағы жобаларды дамытатын халықаралық инвестициялық-инкубациялық платформа. Компанияның негізін қалаушы доктор Питер Ли Гонконгтағы ірі энергетикалық және девелоперлік компаниялардың директорлар кеңесіне жетекшілік етеді.
Неліктен бұл маңызды
Тұрақты авиациялық отын өндірісін жолға қою Қазақстанның жоғары қосылған құны бар өндірістерді дамытуына, ауыл шаруашылығы шикізатын терең өңдеуге және көміртек шығарындыларын азайтуға мүмкіндік береді. Сонымен қатар бұл жоба Алатау қаласын инновациялық технологиялар мен «жасыл» экономиканың халықаралық орталықтарының біріне айналдыруға негіз болмақ.
