Мемлекеттік қызметтер бір жүйеге біріктіріледі. Қазақстанда eGov 3.0 іске қосылып, азаматтар мен бизнеске арналған жасанды интеллект көмекшілерін eGov GPT айналасына шоғырландыру басталды, деп хабарлайды DKNews.kz.
Бұл туралы Үкімет отырысында Премьер-Министрдің орынбасары – Жасанды интеллект және цифрлық даму министрі Жаслан Мәдиев мәлімдеді.
Жаңартылған eGov ұлттық QazTech платформасында жұмыс істейді. Алдағы уақытта жаңа мемлекеттік ақпараттық жүйелер осы ортада әзірленіп, қолданыстағы сервистер де кезең-кезеңімен сонда көшіріледі.
Қызметті іздеудің орнына мәселені жазу жеткілікті болады
eGov-тағы ең үлкен өзгерістің бірі — мемлекеттік қызметті алу тәсілінің өзгеруі.
Бұрын азамат қажетті қызметті өзі іздеп, қай мемлекеттік органға жүгіну керегін анықтап, тиісті форманы толтыруы керек еді. Енді бұл процестің бір бөлігін жасанды интеллект атқармақ.
Сәуір айынан бері eGov GPT цифрлық көмекшісі жұмыс істейді. Пайдаланушы өз жағдайын қарапайым тілмен сипаттайды, ал жүйе қажетті қызметті анықтап, өтінішті рәсімдеуге көмектеседі.
Мұндағы мақсат — азаматты мемлекеттік органдардың құрылымын зерттеуге мәжбүрлемей, сұрақтан нақты қызметке дейін бір сценариймен жеткізу.
eGov GPT арқылы қазір 50 қызмет қолжетімді
Қазіргі кезде жасанды интеллект арқылы ең сұранысқа ие 50 мемлекеттік қызметті алуға болады.
Министрлік мәліметінше, бұл азаматтардың барлық өтінішінің шамамен 30%-ын қамтиды.
Жыл соңына дейін eGov GPT арқылы өңделетін өтініштердің үлесін 70%-ға жеткізу жоспарланып отыр.
Яғни eGov-тағы жасанды интеллект жай кеңес беретін чат-бот болып қалмайды. Оны мемлекеттік қызметті таңдаудан бастап, өтінішті рәсімдеуге дейінгі процестің негізгі құралдарының біріне айналдыру көзделген.
Әр министрлік жеке ЖИ-көмекші жасай алмайды
Жаслан Мәдиевтің баяндамасындағы ең назар аударарлық тұстың бірі басқа мемлекеттік органдарға қатысты болды.
Оларға азаматтар мен бизнес үшін eGov GPT-ден бөлек жұмыс істейтін дербес жасанды интеллект агенттерін әзірлемеу тапсырылды.
Gov
«Орталық мемлекеттік органдар азаматтар мен бизнес үшін eGov GPT-ге байланыстырылмаған дербес ведомстволық ЖИ-агенттерін әзірлеу мен енгізуге жол бермеуі қажет», — деді Жаслан Мәдиев.
Мұның практикалық мәні қарапайым: әр министрлік жеке чат-бот, бөлек қосымша немесе жеке цифрлық көмекші жасап, пайдаланушыны бірнеше жүйенің арасында жүргізбеуі тиіс.
Азамат үшін негізгі кіру нүктесі eGov GPT болуы керек.
eGov 3.0 QazTech платформасына көшті
Жаңарған порталдың негізінде QazTech тұр.
Бұл тек eGov-тың сыртқы дизайнын жаңарту емес. Мемлекет цифрлық жүйелерді ортақ технологиялық архитектураға көшіруге кірісті.
Жаңа ақпараттық жүйелерді әр ведомствоның жеке-жеке әзірлеуінің орнына оларды QazTech негізінде құру көзделген. Қолданыстағы мемлекеттік сервистер де осы платформаға ауыстырылады.
Мұндай тәсілдің мақсаты — бір функцияны қайталайтын жүйелердің санын азайтып, мемлекеттік деректер мен қызметтердің өзара байланысын жеңілдету.
eGov 3.0 осы модельдің азаматтарға көрінетін негізгі бөлігіне айналып отыр.
Порталды қалай жеңілдету керегін азаматтар өздері ұсына алады
Жаңа eGov-та кері байланыс формасы пайда болды.
Пайдаланушылар порталдағы қай процестің күрделі екенін, қандай қызметті жеңілдету керегін немесе интерфейсте нені өзгерткісі келетінін жаза алады.
Министрдің айтуынша, үздік ұсыныстар eGov 3.0-ді әрі қарай жетілдіру кезінде ескеріледі.
«Біз мемлекеттік қызмет көрсету саласында үлкен жолдан өттік. Компьютердегі мемлекеттік қызметтер порталынан мобильді қосымшаға, одан кейін eGov-тағы AI-көмекші мен мемлекеттік қызметтер бойынша кеңес беретін 1414 AI колл-орталығына көштік. Бұл жүйелі трансформация халықаралық деңгейде мойындалды», — деді Жаслан Мәдиев.
Қазақстан БҰҰ рейтингінде 24-орында
Министр цифрлық мемлекеттік қызметтердің дамуын Қазақстанның халықаралық көрсеткіштерімен де байланыстырды.
Қазақстан БҰҰ-ның электрондық үкіметті дамыту индексінде 193 елдің арасында 24-орында тұр.
Ендігі кезеңде міндет тек қызметті қағаздан онлайн форматқа көшіру емес. Негізгі бағыт — азаматтың өзі жасайтын әрекеттер санын азайту.
Яғни адам қажетті анықтаманың ресми атауын, жауапты ведомствоны немесе өтініш формасын алдын ала білуге міндетті болмауы керек.
eGov GPT Aitu мессенджеріне де енгізіледі
Бірыңғай ЖИ-көмекші eGov порталымен шектелмейді.
Алдағы уақытта eGov GPT-ті Aitu ұлттық мессенджеріне енгізу жоспарланып отыр.
Бұл жүзеге асса, азамат мемлекеттік қызметті алу үшін міндетті түрде порталдың өзіне кірмей-ақ, күнделікті қолданатын цифрлық арнадан сұрау жібере алады.
eGov 3.0-дің негізгі сынағы да осы жерде болады: бүгін жасанды интеллект арқылы қолжетімді 50 қызмет пен өтініштердің 30%-ы жыл соңына дейін мәлімделген 70%-ға жете ме және азаматқа мемлекеттік жүйенің ішкі құрылымын білмей-ақ қызмет алуға мүмкіндік бере ме.
