300-ге жуық жас мұғалім халықаралық алаңда бас қосты.
Астанада Қазақстан, Қытай, Қырғызстан және Өзбекстан педагогтері жасанды интеллект, STEM және инновациялық технологияларды сабақта қолданудың жаңа тәсілдерін талқылады, деп хабарлайды DKNews.kz.
Халықаралық жас педагогтер коннектін «Назарбаев Зияткерлік мектептері» ДББҰ Педагогикалық шеберлік орталығы ұйымдастырды. Бұған дейін республикалық деңгейде өткен жоба биыл алғаш рет халықаралық кәсіби алаңға ұласты.
«Жас ұстаз» жобасы халықаралық деңгейге шықты
Бұған дейін жоба «Жас ұстаз: табысқа апарар жол» республикалық форумы форматында ұйымдастырылып келген.
Биыл оның ауқымы кеңейіп, «STEM. AI. Innovation» атауымен халықаралық деңгейде өтті.
Коннект бағдарламасы қазіргі білім беру жүйесіндегі негізгі технологиялық бағыттарды қамтыды:
- STEM-білім беруді дамыту;
- жасанды интеллект құралдарын сабақта пайдалану;
- инновациялық педагогикалық тәжірибелерді енгізу;
- заманауи білім беру модельдерін қолдану;
- педагогтердің цифрлық құзыреттерін күшейту.
Шараға Қазақстан Республикасының Оқу-ағарту министрі Жұлдыз Сүлейменова қатысып, жас педагогтер үшін үздіксіз кәсіби ізденіс пен жаңашылдыққа ұмтылудың маңызын атап өтті.
«ЖИ меңгерген ұстаз өзгерістің негізгі қозғаушы күшіне айналады»
«Назарбаев Зияткерлік мектептері» ДББҰ Басқарма төрағасы Әнуар Жанғозин технологиялардың дамуы мұғалімнің рөлін төмендетпейтінін, керісінше оған жаңа мазмұн беретінін атап өтті.
«Жасанды интеллектіні меңгерген ұстаз мектептегі өзгерістің негізгі қозғаушы күшіне айналады. Технология қаншалықты жетілсе де, ол баланың бойында білімге деген құштарлықты, сыни ойлауды немесе өзіне деген сенімді өздігінен қалыптастыра алмайды. Бұл – мұғалімнің кәсіби шеберлігі мен адамдық ықпалына байланысты. Сондықтан бүгінгі міндет – технологиядан қауіптену емес, оның мүмкіндігін ұстаздың әлеуетін күшейтуге тиімді пайдалану», – деді Әнуар Қанатұлы.
Екі күнде AI мен жаңа білім беру модельдері талқыланды
Екі күн ішінде жас педагогтер қазақстандық және халықаралық сарапшылармен тәжірибе алмасты.
Негізгі назар жасанды интеллект пен STEM құралдарын теориялық тұрғыда талқылауға ғана емес, оларды оқу үдерісіне тиімді енгізуге аударылды.
TED форматындағы сессияларда:
- білім берудегі инновациялық экожүйені дамыту;
- жасанды интеллект мүмкіндіктерін пайдалану;
- венчурлік ойлау мәдениеті;
- Қазақстандағы білім беру жүйесін цифрландыру тәжірибесі талқыланды.
Осылайша жас мұғалімдерге технологияны жеке құрал ретінде емес, білім беру процесін өзгертетін кешенді мүмкіндік ретінде қарастыру ұсынылды.
Қазақстандық және халықаралық сарапшылар тәжірибесімен бөлісті
Коннект спикерлерінің қатарында инновациялар және жасанды интеллект саласындағы сарапшы әрі кәсіпкер Давид Туғанов, венчурлік инвестор Бахт Ниязов болды.
Сондай-ақ Орталық Азия бойынша «Жылдың IT-педагогі» атағына ие болған және Forbes-тің «30 Under 30» тізіміне енген Рүстем Ермеков тәжірибесімен бөлісті.
Қытайдағы Shaanxi Normal University білім беру технологияларының профессоры, доктор Hongliang Ma жасанды интеллект дәуірінде педагогтердің кәсіби құзыреттерін дамыту тақырыбында баяндама жасады.
Халықаралық құрам қатысушыларға әр елдегі білім беруді цифрландыру тәсілдерін салыстырып, ортақ мәселелер мен жаңа мүмкіндіктерді талқылауға жағдай жасады.
Мұғалімдер технологияларды сабақта сынап көрді
Коннект бағдарламасының маңызды бөлігі практикалық форматта өтті.
Қатысушылар үшін:
- NIS педагогтерінің шеберлік сағаттары;
- қолданбалы тапсырмалар;
- командалық квесттер;
- инновациялық жобалардың таныстырылымдары ұйымдастырылды.
Жас педагогтер жаңа технологияларды сабақта қолданудың нақты тәсілдерін сынап, әріптестерімен тәжірибе алмасты.
Бұл формат қатысушыларға форумнан алған білімді жаңа оқу жылында өз мектептерінде қолдануға мүмкіндік береді.
«Әр делегат өз өңіріне тың идеялармен оралады»
Ақтөбе облысы Мұғалжар ауданынан келген жас мұғалім Әділбек Батырбек жобаға екінші рет қатысып отырғанын айтты.
««Жас ұстаз» форумына осымен екінші рет қатысып отырмын. Жаңа оқу жылы қарсаңында мұндай алаң бізге жаңа идея, кәсіби серпін және ерекше мотивация береді. Форумның халықаралық деңгейге көтеріліп, әр елдегі әріптестермен тәжірибе алмасуға мүмкіндік бергені қуантады. Әр делегат өз өңіріне тың идеялармен оралады деп сенемін», – деді Ақтөбе облысы Мұғалжар ауданынан келген жас мұғалім Әділбек Батырбек.
Жоба 20 мыңға жуық мұғалімді қамтыды
«Жас ұстаз: табысқа апарар жол» жобасы 2022 жылы басталған.
Оның мақсаты – еңбек жолын жаңадан бастаған педагогтердің кәсіби дамуына және білім беру ортасына бейімделуіне қолдау көрсету.
Осы уақыт ішінде республикалық форумдарға 1000-нан астам жас педагог қатысқан.
Ал өңірлік іс-шаралар 20 мыңға жуық мұғалімді қамтыды.
Неліктен бұл маңызды
Жасанды интеллект білім беру жүйесіне енген сайын мұғалімге қойылатын талап та өзгеріп келеді. Енді педагогтің міндеті дайын ақпаратты жеткізумен шектелмейді. Мұғалім технологияны дұрыс таңдап, оны оқу мақсатына бейімдеп, оқушының сыни ойлауына және дербес білім алуына жағдай жасауы қажет.
Осы тұрғыдан «STEM. AI. Innovation» сияқты халықаралық алаңдар жас педагогтерге жаңа құралдарды меңгерумен қатар, басқа елдердің тәжірибесін көруге мүмкіндік береді.
Төрт елден келген 300-ге жуық педагогтің бір алаңда бас қосуы тәжірибе алмасуды халықаралық деңгейге шығарып, білім берудегі технологиялық өзгерістерге мұғалімдерді тікелей тартуға бағытталған.
