Астанада Халықаралық жастар күніне орай еліміздің әр өңірінен келген жас кәсіпкерлер, ғалымдар, IT-мамандар, медиа өкілдері, мәдениет және волонтерлік саласының белсенділері бас қосты.
Биыл «Тәуелсіздік ұрпақтары» грантын 30 жас қазақстандық иеленді. Әр жеңімпаз өз жобасын жүзеге асыруға 3 миллион теңгеден алады, деп хабарлайды DKNews.kz.
Жеңімпаздарды ҚР Премьер-министрінің орынбасары – Мәдениет және ақпарат министрі Аида Балаева марапаттады.
2200 өтінімнің ішінен 30 жоба таңдалды
Биыл грантқа қызығушылық жоғары болған. 2200-ден астам өтінім түсіп, оның 1745-і конкурс талаптарына сәйкес деп танылған.
Өтінімдер алты бағыт бойынша қабылданды:
- бизнес – 663;
- ақпараттық технологиялар – 383;
- ғылым – 218;
- мәдениет – 174;
- медиа – 158;
- волонтерлік – 149.
Осы жобалардың арасынан үздік деп танылған 30 автор Астанаға шақырылып, оларға грант сертификаттары табысталды.
Яғни бір жеңімпазға берілетін қаржы – 3 миллион теңге. Бұл қаражат жастардың идеясын қағаз жүзінде қалдырмай, нақты жобаға айналдыруға мүмкіндік бермек.
Тоқаев жастарға үндеу жолдады
Салтанатты шара барысында Аида Балаева Қазақстан Президентінің Халықаралық жастар күніне арналған құттықтауын оқып берді.
Мемлекет басшысы елде жүріп жатқан реформаларға тоқталып, жастарды қолдау мемлекеттік саясаттың негізгі басымдықтарының бірі болып қала беретінін атап өтті.
«Жастарды қолдау саясаты мемлекетіміз үшін әрдайым негізгі басымдық болып қала береді. Қазіргі таңда республикамыздың әр аймағында көптеген мектептер, спорт нысандары, даму орталықтары салынып жатыр. Ауқымды жобалар қолға алынып, дарынды жастарға жан-жақты қолдау көрсетілуде. Бүгін табысталатын «Тәуелсіздік ұрпақтары» гранты – соның жарқын көрінісі. «Жүзден – жүйрік, мыңнан – тұлпарды» анықтайтын үздіктер сайысы озық ойлы, отаншыл, білімді әрі еңбекқор азаматтардың басын қосып отыр», – делінген құттықтауда.
Президент құттықтауында еліміздің барлық саласында түбегейлі реформалар жүргізіліп жатқаны да айтылды. Жалпыұлттық референдумда қолдау тапқан жаңа Конституция Қазақстанның алдағы дамуына жаңа серпін бергені атап өтілді.
«Жастар – мемлекеттің ең маңызды капиталы»
Аида Балаеваның айтуынша, жастарға көрсетілетін қолдауды тек гранттармен немесе жекелеген мемлекеттік бағдарламалармен өлшеуге болмайды. Оның мәні әлдеқайда кең.
Министр қазіргі жастардың болашақта елдің экономикалық, қоғамдық және саяси өміріне тікелей араласатынын атап өтті.
«Мемлекет басшысының жастарға деген қамқорлығы арнайы бағдарламалар мен қолдау шараларымен ғана шектелмейді. Ең бастысы – біз ертең өмір сүріп, еңбек етіп, елдік шешімдер қабылдайтын ұрпақ үшін бүгін қандай мемлекет қалыптастырып жатқанымызда. Президенттің стратегиялық бағыты уақытша күн тәртібін емес, Қазақстанның болашаққа арналған ұзақмерзімді даму негізін айқындайды. Бүгінде еліміздің жаңа даму кезеңінде жастарға үлкен сенім артылып отыр. Себебі білімге ұмтылатын, жаңа идеядан қорықпайтын, өз ісіне жауапкершілікпен қарайтын жас ұрпақ – мемлекеттің ең маңызды капиталы. Мемлекет басшысы жастар мәселесін жеке бір саланың шеңберінде емес, бүкіл мемлекеттік саясаттың болашақ өлшемі ретінде қарастырады. Президент қолға алған саяси, экономикалық және қоғамдық жаңғырулардың түпкі мақсаты – келесі ұрпақтың қуатты, қауіпсіз және әділетті елде өмір сүруіне жағдай жасау», – деді Аида Балаева.
Оның сөзінше, Президенттің жастарға арналған құттықтауы – жас буынға көрсетілген құрметпен қатар, оларға артылған сенім мен жауапкершіліктің де белгісі.
Бес жылда 1,5 миллионға жуық жас жұмысқа орналасқан
Іс-шара барысында жастарды қолдауға қатысты бірнеше маңызды көрсеткіш те жарияланды.
Аида Балаеваның мәліметінше, кейінгі бес жылда Қазақстанда 1,5 миллионға жуық жас жұмыспен қамтылған.
Тағы 192 мың жас кәсіпкерлік негіздерін меңгерген, ал 23 мыңға жуық азамат жеке кәсібін бастау үшін мемлекеттік грант алған.
Баспана мәселесі бойынша да бірқатар мүмкіндік қарастырылған. «Наурыз», «Отау» және өңірлік ипотекалық бағдарламалар арқылы 13 мыңға жуық жас баспана алуға мүмкіндік алған.
Бұл сандар жастар саясатының тек білім немесе мәдениет саласымен шектелмей, жұмыс, кәсіпкерлік және тұрғын үй мәселелерін де қамтитынын көрсетеді.
«Тәуелсіздік ұрпақтары» гранты деген не?
«Тәуелсіздік ұрпақтары» гранты Қазақстанда талантты және бастамашыл жастарды қолдау үшін 2021 жылы Мемлекет басшысы Қасым-Жомарт Тоқаевтың бастамасымен тағайындалған.
Бағдарламаның ерекшелігі – жас қазақстандықтарға дайын жобаны қаржыландырумен ғана шектелмей, жаңа идеяны іске қосуға мүмкіндік беруінде.
Грант бизнес пен IT-ден бастап ғылым, мәдениет, медиа және волонтерлікке дейінгі бірнеше бағытты қамтиды.
Бағдарлама іске қосылғаннан бері 153 жас қазақстандық грант иегері атанды.
Ал биыл бұл тізімге тағы 30 жас қосылды. Енді олардың алдында ең маңызды кезең тұр: 3 миллион теңгелік қолдауды өміршең жобаға айналдырып, өз идеясының нақты нәтижесін көрсету.
