Полиция демалыс орындарындағы бақылауды күшейтеді. Алматы қаласы полиция департаментінің бастығы Айдын Кабдулдинов Бостандық аудандық полиция басқармасының жұмысын тексеріп, қоғамдық қауіпсіздік пен құқық бұзушылықтардың алдын алу бойынша нақты тапсырмалар берді, деп хабарлайды DKNews.kz.
Жұмыс сапары барысында ол аудандық полиция басшылығымен жедел-қызметтік жағдайды, жұмыстың басым бағыттарын және профилактикалық шараларды талқылады. Кездесу қорытындысында алдын алу жұмыстарын күшейту тапсырылды.
Flow Park полицияның ерекше бақылауына алынады
Айдын Кабдулдинов Бостандық ауданындағы жаңа Flow Park қоғамдық кеңістігін де аралады.
Бұл аумақ белсенді және отбасылық демалысқа арналған. Мұнда спортпен айналысуға және серуендеуге арналған аймақтар бар. Полиция мәліметінше, жаңа парк қала тұрғындары мен қонақтары жиі келетін демалыс орнына айналып келеді.
Департамент бастығы мұндай қоғамдық кеңістіктерде полицияның көзге көрінетіндей жұмыс істеуі қажет екенін айтты.
«Мұндай орындар жайлы ғана емес, әрбір келуші үшін қауіпсіз болуы тиіс. Мұнда құқық бұзушылықтардың алдын алып, қоғамдық тәртіпті қамтамасыз ету, балалар мен отбасылардың қауіпсіздігіне ерекше көңіл бөлу маңызды. Полиция халық демалып, бос уақытын өткізетін орындарда көзге көрініп, қауіпсіздікті қамтамасыз етуі керек», – деді Айдын Кабдулдинов.
Құқық бұзушылықтың алдын алуға басымдық берілді
Бостандық аудандық полиция басқармасындағы кездесуде негізгі назар құқық бұзушылық жасалғаннан кейін әрекет етуге емес, оның алдын алуға аударылды.
Жауапты бөлімшелерге:
- профилактикалық жұмысты күшейту;
- қоғамдық тәртіпті тұрақты бақылау;
- адамдар көп жиналатын демалыс орындарына ерекше назар аудару;
- балалар мен отбасылардың қауіпсіздігін қамтамасыз ету тапсырылды.
Flow Park аумағындағы қоғамдық тәртіп пен қауіпсіздік мәселелері енді жауапты полиция бөлімшелерінің тұрақты бақылауында болады.
Алматыда қоғамдық кеңістіктерге бақылау күшейіп келеді
Айдын Кабдулдинов аудандық полиция басқармаларын аралау жұмыстарын жалғастырып жатыр. Бұған дейін полиция басшылығы Алматыдағы адам көп жиналатын басқа нысандардағы жағдайды да тексерген.
Мәселен, жақында Жетісу ауданындағы Орталық киім-кешек базарында қоғамдық қауіпсіздік, көші-қон бақылауы, заңсыз сауда және автотұрақ мәселелері қаралды. Полиция мұндай орындарда мәселенің күрделенуін күтпей, профилактикалық жұмыс жүргізуге басымдық беріп отыр.
Бұған дейін біз Алматы полициясының Орталық киім-кешек базарындағы бақылауды күшейткені туралы жазған едік. Онда да басты назар адамдар көп жиналатын орындардағы қауіпсіздік пен құқық бұзушылықтардың алдын алуға аударылған.
